Netanyahu an ‘tihsual’ a nei Biden-an ti
US President Joe Biden chuan Gaza chungchangah Israel Prime Minister Benjamin Netanyahu chuan ‘tihsual’ a nei tiin a sawi.
“A kalpui danah tihsual a neiah ka ngai. A kalpui dan hi ka pawm lo” tiin interview a neihnaah a sawi a.
Gaza chuan tun atanga kar ruk atanga kar riat chhungin eitur leh damdawi an mamawh tawk an nei hman tur a ni a ti bawk.
Karkalta khan Biden chuan Israel in eitur leh damdawi a pek luh dan azirin US in a thlawp leh thlawploh tur a hril ang tiin a lo sawi tawh bawk.
Israel thung chuan Gaza a tanpuina lut leh semchhuah khawtlaiah engmah inhnamhnawihna a nei lo tia sawi thungin Gaza a UN agencies te zawk chuan a mamawh ber berte hnenah tanpuina an pe lo zawk tiin a sawi thung.
Khawvel ram ten nasa taka an nawr mek laiin inkahhai a awm theih nana inbiakna chuan rah tha engmah a la chhuah thei lo bawk.
Biden chuan tun hnai lawka World Central Kitchen convoy Israel in a kahfuh chu thinrimthlak a tih thu sawiin highway ah lehnghala drone in a bei chat chu a dik lo a ti a.
Israel Defense Forces te pawhin Aid worker te convoy an kap fuh chu pawi an tih thu sawiin tihsual pawi tak tia sawiin inquiry neih zuiah senior officer pahnih chu an ban zui nghe nghe a ni.
Biden chuan, “Tuna ka ngenna chu Israelis te hian inkahhai awm tir rawh se, kar ruk atanga kar riat chhung vel chu eitur leh damdawi ten Gaza an lut tur a ni” tiin a sawi bawk a.
President Biden chuan Hamas te pawhin inkahhai remtiin an mitang la kawl te an chhuah zalen tur a ni a ti bawk.
Israel chuan tun hnaiah northern Gaza luhna chu hawngin water port pawh a hawng anga tichuan tanpuina tam zawk a lut thei dawn a ni a ti a. Mahse, engtiang chiahin nge a kalpui dawn kimchangin a la sawi lo thung.
Biden chuan US ram chhungah pawh Israel chungchangah nawrna nasa tak a tawk mek a. Tun hnaiah Biden chuan tawngkam hriam zawk hmang zeuh zeuhin a bik takin Netanyahu chu langsar takin a sawisel a ni.
Hetihlai hian US chuan Israel hnenah military supply bomb, missiles leh ammunition te chhum lo chat lovin a thawnlut reng tho thung.