MP THLAN

Zoremi Hmar Zote

Naktukah MP kan thlang dawn. Campaign hun pawh a tawp ta; kan rama party hrang hrangte chu an candidate te tlin theih nana an campaign chuan a vawrtawp a thleng mek niin a lang.
Tu hi nge tha ang a, tunge tling ang tih chu mipui lam chan a ni a, ngaihtuahna fim tak hmanga a tha ber ni tura kan rin thlan chu kan mawhphurhna a ni. Politics ka ngaihven lo, ka tui lo tih mai mai a hun lo va, ram leh hnam kan hmangaih a nih chuan mitha tur ni-a kan rin thlang tura vote thlak ve ngei hi khua leh tui tha nihna a ni. Party tinte candidate an tha the thaw hlawm hle a, chanchin duhawm tak tak nei vek an ni; an manifesto te ngaihtuah phei chuan tu ber nge thlan tur tih hriat a har hial zawk. Mahse Pathianin kan tana tha ber tur chu a ruat mai ang tih pawm ila kan dam tlang mai awm e.
Central lamah khuan tangrual pawl hlawm hnih lian tak, NDA leh tun hmaa UPA ni thin Congress kaihhruai ‘INDIA’ inti ta an awm tih kan hre theuh a, NDA leh INDIA-ah hian party hrang hrang an tel a, telna nei lo te pawh an awm. Mizorama tualto party MNF, ZPM, PC te tan hian a eng emaw zawk zawkah hian tel ve kher tur a ni em tih zawhna chu tawi tein ‘Teuh lo mai’ tih a ni. Khawi state emaw, UT emaw-a tualto party te khan an duhthlanna liau liaua zawm emaw zawm lo emaw an ni. NDA emaw, INDIA emaw pawla tel ve a that leh that loh emaw te chu thu hran ni se.
Tun Lok Sabha 17na term zo mai turah pawh hian NDA emaw, INDIA lama tel lo party an awm ve tho. An zingah chuan Lok Sabha MP 19 nei, Telengana tualto party YSRCP pawh an tel a, Odhisa-a rorelna hun eng emaw chen lo chelh tawh leh la chelh mek MP 12 neitu BJD pawh an tel a, Mayawati party MP 8 nei pawh NDA emaw, INDIA emawa tel ve lo an ni. Punjab-a party hlun, Siromana Akali Dal, MP 2 nei pawhin NDA emaw, INDIA emaw zawk hi zawm an nei lo. Party dangte pawh an la awm a, Independent MP pahnih nen NDA leh INDIA-a tel ve lo hi MP 50 an awm mek.
Kan ramah chuan:
Mi dik kan duh a, kan ram leh hnam aiawh tura mi tha kan duh a nih si chuan dân ang taka thianghlim taka in-candidate a, sum leh pai vawrh chîng lo ngei chu, thianghlim taka tling ngei tura kan vote khan, Pathian leh kan hnam mitah kan thiang a, kan hlû a, kan fâi a ni. Chutiang chiahin a dik lo tih hre reng chunga an pawisa tawktarh lo dawng duhtu kan awm zel tih a lang chiang em em mai. A semtu dik lo bawk, a dawngtu lah dik lo bawk.
A dik lo tih hre reng chunga kan phâk tawk ang zel leh, kan ei rûk ve theih chin apiang ei rû a, ram hruaitu tha beisei leh si thin kan ni te hian ka hre thin. Inthlan dawna sum lêng vâk pawh a dik lo tih hriaa dawng duh lo chuan an dawng duh lo mai a, a semtu lamah pawh a dik lo a ni ti-a sem duh lo chuan a sem lo mai. Ram hmangaihna tak tak hi ramri lama invaivung thlâk emaw, vai velh tih lam vel hi a ni lo; kan phâk ang tawka dikna leh rinawmna vawng chunga vote thlâk te, party lam thlir lova mi dik chauh vote tumna thinlung nena vote thlâk leh, kan nitin khawsak phunga dikna leh rinawmna vawn tlat te hi ram hmangaihna zia rawn irh chhuak a ni a, a mawiin a hlû a, chunglam tan pawh malsawm a nuam deuhin ka ring e.
Mipui hrim hrim ngaihtuah hi chuan party mi leh sa ai mahin àwn lam em em pawh nei lo, Neutral kan tih mai hi kan tam zawkin a rinawm a. Hengho hi kan pawimawh a nia, kan ti ngawt tlangpui bawk a. Mahse kan pawimawhzia hi kan ngaihtuah lo a ni mai thei. Party ruihchilh, a chhia a tha pawh thliar hlei thei miah lova mahni ngaihdan awr puar fangra awrh tlat mai, party aiawh candidate thlir ngur mai, a party tana tang ngawt maite rilru ang lo taka kan ram neihchhun tana rilru fim leh thiang tak hmang a, ngaihtuahna fel tak nei chunga vote kan thlak ngei a va tha ve!
Vote thlâk peih loh te hi a ngaihtuah tlêmthlâk lutuk! Vote pawh thlâk peih lo, tu hi nge kan ram leh kan khawtlang hruaitu atan tha ang tih pawh ngaihtuah peih lo khawpa mâwl kan tam! Ram hruaitu nih chu khawi lamah, khua leh tui tha an nih hi mumangah pawh lo ring chhin reng reng suh u! Ram/khawtlang hruaitute demin an sawi chhe ve khanglang fo lehnghal, nuih pawh an tiza lo! Hetiang mi hi chu ram tinin kan kawl nameuh mai, ‘khua leh tui tha i ni lo, nang hi ram thanmawhbâwk chu i nih hi’ va ti ngawt ila dam sen ve luau si chuan an lo haw ve leh tumhrang emaw a ni ang a, dàidùla