Zohnahthlak NIT zirlaite ngensak

Manipur buaina avanga Manipur-a zirna chhunzawm thei lo Zohnahthlak NIT zirlaiten National Institute of Technology Mizoram-a an zir chhunzawm theih nan Mizo Students’ Union chuan hma a laksak.
MSU Gen. Hqrs. hruaitute hian Ningani khan NIT Mizoram director Prof S Sundar hmuin, Kuki Student’s Organisation-in Manipur NIT zirlai 38-te tana tanpui an ngenna kal zelah NIT director leh registrar hnenah Mizoram NIT-a zirna an chhunzawm theih dan tur ruahman sak turin an thlen a. Heng zirlaite hian Manipur buaina avangin class an kal chhunzawm thei tawh loa, semester hnih an thulh phah tawh thu an thlen.
NIT Mizoram director chuan Manipur state buaina avanga zirlaiten an tuar chu tha lo a tiin, zirna chawlh phah khawpa inbeihna thleng chu fel lo a tih thu MSU hruaitute a lo hrilh a. Zirlaiten zirna an chhunzawm ngei theihna turin Ministry of Education leh NIT Manipur director hnena a thlen tur thu sawiin, tun dinhmunah exam buatsaih mai tur a nih tawh avangin semester tan leh hma 2024 August 1 hma chuan zirlaite dinhmun tur hriat theih a beisei thu a lo hrilh a. Zirlaite pawh engtik lai pawhin class an chhim a phal reng tih a sawi bawk.