Khawlum vangin Bangladesh-in school khar

Khawlum turu avangin Bangladesh a school naupang maktaduai 33 te chu school chawlhtir an ni a, Bangladesh-ah hian temperature-in 42 degree Celcius a pel a ni.
School leh College te chu 27 April thlenga khar tur tih niin nikum pawh khan thuneitute chuan khawlum turu lutuk avangin school an lo khar tawh bawk.
Khawlum zual zelah Philippins leh India ram hmun thenkhatah pawh school khar a ni a, heatwave turu tak chuan Asia a tuam mek a ni.
“Bangladesh naupangte hi khawvel huap pawha rethei ber ber an ni a, khawlum lutuk avanga school khar hi kan ngaihven takzet a ni” tiin Shumon Sengupta, Save the Children’s Bangladesh director chuan a sawi.
Bangladesh hi a awmna ram hniam tak mai niin climate crisis avanga tuar nasa thei ber ber ram zinga tel a ni bawk.
Intergovernmental Panel on Climate Change te chuan sea level 30- to 45-cm in sanbelh se chuan Bangladesh tuipui kam hnaih district a mipui maktaduai 35 vel te chenna chu a chim mai dawn tiin an sawi.
Nilaini khan Muslim sang tam tak te chuan mosque leh field ah te punkhawmna neiin ruah dilin an tawngtai bawk a.
“Ruahtui kan dawn that loh avangin nun a harsa takzet a ni. Mirethei zawk te tawrhna a nasa hle” tiin Islamic cleric Muhammad Abu Yusuf chuan a sawi.
Bangladesh weather authority te chuan extreme heat chuan karkhat tal hun a la awh dawn tiin an sawi bawk a.
Damdawi In leh clincis te chu khawlum lutuk kaihhnawiha natna luna leh khawsik te enkawl thei tura inralring tura hriattir an ni.
Heatstroke avanga damdawi in panpui te chu air-conditioned wards ah dah an ni ang tiin Bangladesh Heealth Minister Samanta Lal Sen chuan a lo sawi tawh bawk.