2002 June – 2024 March inkarah Kolasibah HIV kai 1859 hmu thar

Kum 2022 June atanga chhiarin kumin March thleng khan Kolasib district-ah HIV kai mi 1859 hmuh thar an ni a, kai thar zingah kum 25-34 inkar an tam ber.
District AIDS Prevention & Control Committee Kolasib chu an chairman, bawrhsap John LT Sanga hoin Nilaini khan an thukhawm a. An district-a HIV darh zel tur ven dan, HIV kai awlsam thei dinhmuna awm mekte enkawl dan tur leh zirna in hrang hranga HIV laka inven dan uar zawka kalpui dan rel a ni.
Report-a tarlan danin, Kolasib district-ah hian June 2002 atanga March 2024 thleng khan thisen 95534 endik tawh atangin 1859 chu HIV positive tih hmuhchhuah a ni a, hei hi za zelah 1.94 a ni. April 2023 atanga March 2024 inkara thisen endik chu 5578 a ni a, HIV kai 104 awmin ART enkawlna pek an ni.
MSACS (IEC) joint director Zuiliani Hrahsel chuan ‘Intensive HIV/AIDS Awareness Campaign in Rural Areas’ tih thupuia hmangin a zirtir a. Kolasib district khaw hrang hranga awareness campaign kalpui dan tur, khaw chhung hmun lun laia zirtirna keng thuziak tar dan tur, zirna in hrang hranga awareness campaign kalpui dan tur a sawi a ni.
District community resource group din leh an hnathawh dan tur bakah Adolescence Education Program kalpui dan tur sawi ho a ni bawk.