Biden-an Israel ralthuam pe lovang ti

US President Joe Biden chuan Israel in Gaza city Rafah a ground operatioon a nei a nih chuan US-in ralthuam thenkhat a pek te chu a titawp ang tiin a sawi.
“Rafah an bei lui a nih chuan ralthuam thenkhatte kan pek kan ti tawp ang” tiin CNN ten an interview naah a sawi a. mahse, ‘Israel himna chu thupuiah an nei zel dawn’ tiin a sawi thung.
US-in langsar taka a dodal chungin Israel chuan Rafah chu run a tum thoa ngaih a ni a.
Southern Gaza a Rafah hi Hamas te tawmkhawm mekna nia ngaih a ni a, mihring an bit hle. US officials te chuan Rafah beih a nih chuan Gaza atanga refugee tam tak awmkhawmna a ni bawk nen civilian nunna chan an tam lutuk a hlau a ni.
“Ralthuam leh artillery te kan pe lo mai dawn a ni” tiin Biden chuan CNN tena an interview naah a sawi a. US chuan Rafah a thil thleng mek chu ground operation a ni lo a ti a. “Mihring bitna hmun an la lut lo va. Tuna border an bei hi chu an tidik a ni” tiin Israel hmalak mekna chungchang a sawi a.
“Israeli Prime Minister Benjamin Netanyahu leh a war cabinet te hnenah chiang takin ka sawi tawh a. Mipui bitna an lut a nih chuan kan thlawpna an hmu dawn lo,” tiin a sawi bawk.
Biden chuan US ralthuam te chu Israel chuan gaza a civilian te tihhlum nan a hmang tih an hriat thu a sawi a. A nih leh Israel chuan ‘red line’ a pel em tia zawhna erawh US president chuan ‘la pel rih lo’ tiin a chhang a ni.
Tun hi Rafah run tum chungchanga president Biden tawngkam na ber la niin a tum khat nan US chuan Israel hnenah ralthuam a pe lovang tia a sawina a ni bawk.
US chuan Israel hnenah bomb sang tam tak te a thawn tur a tikhawtlai rih tawh bawk a, chung te chu review neih leh phawt ni se a ti a ni.
Nilaini khan Defence Secretary Lloyd Austin chuan ralthuam turu tak tak te chu Israel hnena thawnluh tum tihkhawtlai a nih mek thu Senate hnenah a hrilh a ni.
Mahse heng ralthuam te hi nakina la pek tur tih zinga mi niin tuna tihkhawtlai chuan nghawng a neih vak rin a ni lo thung a. Mahse, Israel in bomb a hman uar dan ngaihtuah chuan nghawng a nei thuai dawna ngaih a ni thung.
President Biden chuan Democrats leh US mipui thnekhatte atangin Gaza a civilian nunna chan tam lutukah Israel chetdanah inrawlhna nei tura nawrna a tawk nasa hle a ni.
US officials te chuan Gaza chhim lam gate pahnih atangin tun hnaia Israel-in a tank te Rafah chhim lama a tirhluh hnuah tanpuina pakhatmah luhbelh a awm tawh rih lo an ti bawk.
Hetih lai hian Israeli military spokesman Daniel Hagari chuan US chuan indo tirh phat atangin security assistance a pek thu sawiin ram pahnih ngaihdan inang lo neih te chu chinfel a ni ang tiin a sawi.
Mahse Netanyahu a Likud party member langsar tak chuan US in Israel tun hnaia insum tura a nawrna chhan chu US ram chhung politics kaihhnawih vang ni ngeia a ngaih thu a sawi thung a.
“American inthlan leh helai thil thleng hian inlaichinna neihtir tum hi ka pawm ve lo” tiin Boaz Bismuth, Israeli parliament membe rleh foreign affairs and defence committee member ni bawk chuan a sawi.
Rafah hi tanpuina thawnluhna chhuahka ber niin nikum october atanga Israel leh Hamas te indo hnua mipui tena tlanchhuah nana an hman kawng awmchhun a ni bawk.
Rafah luhnate chu Israeli military te chuan an hawn tur thu sawiin Hamas rocket tena an kah avangin ni li lai an khar tawh a, mahse Kerem Shalom crossing chu an hawn tur thu an sawi bawk.
Thawhtanni khan Israeli military te chuan Rafah city khawchhak lama civilian sang tam tak te chu Hamas fighter te lakah ‘limited’ operation a nei dawn tiin hmunhim lama insaseng turin a lo titawh a ni.
Hetih lai hian inkahhai a awm theih nan leh Israeli mitang leh Palestinian mitang te inthleng tawn a nih theih nana inbiakna chu kalpui chuhnzawm a ni a. Cairo khawpuiah Israel leh Hamas aiawh te chuan palaite hmangin inbiakna an chhunzawm a ni.
Nikum 7 October a Hamas tena southern Israel luhchhuaha mi 1,200 chuang an tihhlum hnuah leh mitang 250 vel a lak hnuah Israel chuan Gaza a run zui a. Gaza ah nunna chan 34,780 chuang an awm tawh niin Hamas-run health ministry chuan a tarlang.