Police-te vote thlak theih nana MPCC hmalakna hlawhtling lo

State pawna duty vanga MP inthlana vote thlak ve ta lo Mizoram Police-ten vote an thlak theih nana hma an lakna chu a hlawhtling lo tih Congress party chuan an sawi.
MPPC Legal department chairman TT Zothansanga chuan, inthlan duty-a state pawna chhuak police-ten vote an thlak ve thei dawn lo tih an hriat veleh CEO Mizoram hnenah lehkha ziakin, vote an thlak theih nan hma la thuai turin an ngen a. Amaherawhchu Election Commission of India-in dan ang baka special arrangement siam a remtih loh avanga police-ten vote an thlak nana hma an lak theih loh thu chhanna an hmuh avangin an lungawi lo hle a. ECI leh state sawrkar (political leader) ten hma an lak duh tak lohah chuan police-te chanvo humhim tumin Gauhati High Court-ah an kal a. An case hi priority-a ngaihtuah sakin, May 31 khan motion hearing neih a ni a. Vanduai thlak takin High Court hian an ngenna a tih hlawhtlin sak theih dawn loh thu hrilhin, an petition pawh hnukkir turin thurawn an pe a. Police 1047-ten vote an thlak theih nana hma an lakna chu a hlawhtling ta rih lo tih a sawi a ni.
Police 1047-in vote an thlak phalsak ni loa, an democratic right – ‘Right to Vote’ palzut sak an nih chhana a mawhphurtu bul ber chu ZPM sawrkar a ni tih sawiin, “Rule 18A of Conduct of Election Rules-in a phut dan chuan, inthlan duty-a hmun danga chhuak turte tan returning officer-in postal ballot a siamsak anga, duty tura an chhuah hma in postal ballot hmanga vote an thlakna tur a bika RO-in a siam, Special Facilitation Centre-ah vote an thlak tur a ni. Amaherawhchu, police-te democratic right hi ngaihthahin leh democracy hnuaia mipui chanvo pawimawh ber pakhat, kan chunga roreltu tur thlan theihna chanvo an palzut sak a. Vote an thlak theih nana ruahmanna siam loin hmanhmawh bak lengin police-te state pawna an thawn hi a dik loa, a thinur thlak a ni,” a ti.
Hei hi ngaihpawimawh sak se chu, Rule 18A anga vote an thlaktir phawt hnuah state pawna duty turin an tir chhuak mai tur a ni tih TT Zothansanga hian a sawi a. ECI emaw Ministry of Home Affairs emaw thu a nih avang ngawta mipui chanvo namnula thil tih chu state puitling tih dan tur a ni lo, tiin, “Mipui chanvo humhim sak hi state sawrkar mawhphurhna a ni a, police-te chanvo humhim sak duh lo leh humhim sak tura thudik tan ngam lo ZPM sawrkar hi kan dem a ni,” a ti.
Home ministry-in deployment order a rawn chhuah hian harsatna, thil awm theite chhut/ ngaihtuah hmasa loa zawr taka lo awih nghal zel turah an ngai loa, vote thlak a buai dan turte a hriat lawk theih a, sawifel theihah an ngai tlat tih a sawi a ni.