Mizoramah sawhthing quintal maktaduai 1 vel thar inbeisei – Chief minister

Kumtharah hian Mizoramin sawhthing quintal maktaduai khat vel a thar an beisei tih chief minister Lalduhoma chuan a sawi. Sawhthing lei leh hralh leh a sawngbawl zui chungchangah Thawhtanni khan chief minister ho hian minister leh official dangte an thukhawm a. Sawrkar flagship programme – thlai thar pali lei chu an tihlawhtling ngei ngei dawn tih chief minister hian sawiin, tun atanga thla 6 velah heng thlai hi a thar chho mai dawn a, chumi hrereng chuan tih tur awm apiang an lo tih ve zung zung a, chak taka inbuatsaih theuh turin mawhphurtute a chah. Kuhva chingtute harsatna pawh thapui thawha an bawhzui a tul tih a sawi bawk.
Kumtharah hian Mizoramin sawhthing quintal maktaduai khat vel a tharchhuak tura ngaih a ni a. Free market hmangin lei leh hralh hi kalpui zel tur a ni anga, market a kaltluan theih nan leh loneituten an tharchhuah zawng zawng an hralh theih nan thil tulte tun thutkhawmah hian sawi a ni. Sawhthing minimum support price hi nakum January atanga May inkarah pek nise an ti.
Sawhthing hi a hralhna kaltluang (free market) pangngaia loneituten an hralh theih bak a grade hniam, process ngai chi awm ta se, engtia kalpui tur nge tih an sawi nghal a, hemi atana private company rintlakte thawhpui dan tur rel a ni.
Kuhva chingtute harsatna sutkian dan tur, Mizorama processing plant siam chungchang pawh an sawi.
Thutkhawmah hian Agriculture minister PC Vanlalruata, Horticulture minister Prof. Lalnilawma, Commerce & Industries minister F Rodingliana, adviser to CM Dr KC Lalmalsawmzauva, commissioner & secretary to CM Vanlaldina Fanai bakah a kaihhnawih sawrkar hotute an tel a ni.