MPL 11 – Aizawl FC an chak nuamsa

July ni 13, Inrinni khan LZ Juice MPL 11 Round 2 khelh chhunzawm a ni a, champion hlui Aizawl FC chuan nuamsa takin hnehna an chang a, an khingpui Sihphir Venghlun FC an sawp. Inrinni-a inkhel dangah Chawnpui FC leh SYS FC te an inhnehtawk ve thung.
Aizawl FC 6-1 Sihphir Venghlun FC
I League champion hlui leh MPL champion hlui Aizawl FC hian MPL club thar Sihphir Venghlun FC an hmachhawn a, 6-1 ngawtin hnehna an chang. AFC tan hian Augustine Lalrochana chuan goal li ngawt a thun a, ‘Man of the match’ ah thlan a ni.
RG Stadium-a Aizawl FC leh Sihphir Venghlun FC te an inkhelh tum hian goal a lut hma hle a, chawlhlawk hmain goal thum ngawt a lut hmann. Inkhel tan atanga minute 15-naah Lalrochhana chuan hmahruaina goal a thun. Chhana goal thun atanga minute thum hnu lekah Lalbiakdika Fanai chuan Aizawl FC goal hnihna a thun zui leh zat a, minute 18 chhung lekin goal hnih an thun hman. Goal hmahhruai thuntu Chhana hian minute 42-naah an goal thumna a thun zui leh a, 3-0 a hmahruai chungin chawlhlawk an hmang.
Chawlhlawk hnu lamah Sihphir Venghlun FC in bul an tan tha a, goal thun hmasa zawkah an tang. Minute 56-naah Lalthanpuia chuan goal thunin an si phurh a sut then. Biakdika goal hian AFC a chhiahkawlh a ni ta ber a, Aizawl FC in goal thum dangin an chhang let. Goal hnih thun tawh Augustine Lalrochana chuan minute 70-naah goal thunin hattrick a siam a. Hattrick a siam hnuin minute thumna lekah an goal ngana a thun belh zui leh cheu a, MPL 11-ah match khata goal li thun thei hmasa ber a ni. Lalrochana goal lina a luh hnu lawk minute 76-naah AFC tan Lalhriatpuia chuan an goal rukna a thun zui leh a, 6-1 ngawta hnehna changin point thum an hmu zui ta a ni.
AFC hian LZ Juice MPL 11 a an khelh hmasak berah hnehna an chang zo lova, Chawnpui FC nen 1-1 in an inhnehtawk. An khelh hmasak berah chak zo lo mah se an match hnihnaah erawh awlsam takin hnehna an chang. An academy player chhawr nasa AFC hian he hnehna vang hian inrintawkna sang zawk an neih ngei a rinawm.
SYS FC 1-1 Chawnpui FC
Inrinni a inkhel hmasa zawkah point thum hmu tawh SYS FC leh point khat hmu tawh Chawnpui FC te point thum hmuh tumin an inhmachhawn a. Inkhel hmuhnawm takah 1-1 in an inhnehtawk.
SYS FC leh Chawnpui FC te hi an inhnehtawk hle a, goal pawh an lut lawk thei lo. Goal awm lova chawlhlawk an hman hnuin chawlhlawk hnu lamah goal a lut ta thuai thung. Minute 51-naah Chawnpui FC tan Zothansanga chuan hmahruaina goal a thun. He goal hian SYS FC muhil a kaitho a, goal thun tumin an khingpuite na takin an nawr zui nghal. Goal an chhuah atanga miute 10-naah Lalhumhima chuan goal thunin an si phurh a sut. Goal khat ve ve an thun hnuin inkhel a hmuhnawm zui viau a, goal thun tumin innawr tawn nasa viau mah se goal lut a awm belh thei lo, chak zawk awm lovin an intha then. He inkhelah hian Chawnpui FC player pawimawh RVL Nunmawia chu ‘Kuriz Man of the Match’ ah thlan a ni.
Hmahruaitu Chanmari FC
LZ Juice MPL 11 Round 2 khelh zawh a ni a, team 8 ten vawihnih theuh an khel tawh. Round 2 an khelh zawh thlengin Chanmari FC chu hmahruaitu an ni. Chanmari FC hian hnehna an chang zawn a, point ruk hmu thei awmchhun an ni. Chanmari FC hnuaiah chiahah Aizawl FC an awm a, anni hian point li an hmu mek a, pathumnaa awm mek SYS FC nen an point hmuh a inzat mek. Champion lai Mizoram Police FC in point thum an hmu tawh a. FC Bethlehem leh Sihphir Venghlun FC in point an la hmu lo.