October-ah health care ruahman thar kalpui tum a ni – MSHCS CEO

Mizoram Health Care Society chief executive officer Dr Biakthansangi chuan health care ruahmanna thar hi October thla chung ngeia kalpui an tum tih a sawi.
Thawhlehni khan MPCC treasurer Dr Lalmalsawma Nghaka chuan Mizoram Health Care Society CEO hi hmu in, kumin April-a health care scheme kal lai a zawh hnu ah in enroll thar ngai leh duh, natna hrang hrang – cancer leh natna khirh dangin a tlak buak, inenkawl ngaihna hre lote an lainatawmin an dinhmun a khirh hle a. Inenkawl ngai, inenkawl thei silo thahnem tak awm chu health care scheme thar a awm hma tal an lo inenkawl lailawk theih nan ruahmanna siamsak a tul tih a thlen a ni.
“Health care-a an sum hman theih zat hmang zo tawh, inenkawl nana health care-a innghat, miharsa tam takin harsatna an tawk mek a, an inenkawlna, a bikin chemotherapy la mek, dialysis tih ngai leh natna hrang hrang avanga enkawl ngai mek, inenkawl chhunzawm thei lo an awm hi pawi kan ti a, an tan a bik taka ruahmanna sawrkarin siamsak turin kan ngen a ni,” a ti.
Health care chungchangah MLA inthlan hma khan Congress chuan manifesto-ah an nei a, AICC expert-te nen zirchiangin ruahman a ni tih Dr Lalmalsawma Nghaka hian sawiin, ZPM chu health care chungchangah ruahmanna nei anga insawiin, manisfesto ah pawh an telh ve tho a. Thuneihna an chan hnu ah an ruahmanna kha a hmantlak ta lo nge, an ti hleithei ta lo an hre lo tih a sawi. Mahse health care hi mi harsa tak tak, mamawhtu an tam si a, a tuartu mipui an nih avangin hma la ngei turin an phut tih a sawi a ni.
CEO Dr Biakthansangi chuan health care ruahmanna thar hi kumin October thla chung ngeia kalpui an tum thu leh a hlui pawh engemaw chen extend chungchang an ngaihtuah thu Congress hruaitu hi a lo hrilh a ni.