Bastad quarter-final lut Nadal
Kumin January thla hnu lama a vawikhatna atan Rafael Nadal chuan quarter-final a thleng a, Ningani khan 6-4, 6-4-a No. 5 seed Cameron Norrie Great Britain No. 5 seed Cameron Norrie hnehin Sweden rama Bastad khaw tournament Nordea Open last eight a lut.
Unseeded Nadal hian No. 4 seed Mariano Navone a tum leh ang. Argentine Navone hi 6-4, 6-2-a India player Sumit Nagal hnehtu a ni.
A thiamna mual Roland Garros lama khelh tur Paris Games 2024 tennis tournament atana inbuatsaihna kalpui a duh avangin Spaniard hian Wimbledon pawh kha a hawisan ta kha a ni a; Paris-ah hian singles leh doubles-ah a chhuak ve ve dawn a, doubles-ah hian Carlos Alcaraz nen an inkawp ang.
Swedish Open an tih bawkah pawh hian doubles-ah Casper Ruud nen an inkawp a, vawiin hian semi-final an khel dawn nghe nghe.
Ningani singles match-ah set hnihna an tan fel hlawt tihin Nadal hi chiang zeta tluin, a ban a sawh deuh avangin ‘medical treatment’ a han la a, mahse, chu chuan last eight a luhna a dal zo ta chuang lo a, season kal laia a khelh that ber tum a la ni.
Hnehna a chan hnuah Nadal chuan, “Roland Garros hnu lama Tour-a la inlan leh lo ka nih avangin tuntuma ka tournament hmachhawn danah hian ka lung a la awi viau rih a, player ropui Cameron-te ang hmachhawn theihna hun remchangte ka han nei leh zel a; ka inkhelh tam tawk loh avangin hmasawnna tur lai erawh ka la ngah deuh,” a ti.
Kumin May thla French Open first round a paltlang zawh loh hnu khan Rafael Nadal hian singles match a khel leh ta lo vang vang a, Swedish Open-ah Olympic inbuatsaihna a kalpui leh thei ta a, first round-ah 6-3 6-4-in Swedish tennis legend Bjorn Borg-a fapa kum 21 mi leh world number 461 ni bawk Leo Borg a hneh a, last eight a lut zui ta hial a ni.
Ningani inkhel dangah Kazakhstan player Timofey Skatov chuan No. 3 seed Tallon Griekspoor of the Netherlands lakah 1-6, 6-3, 6-4 hnehna changin, seventh-seeded Nuno Borges of Portugal pawhin a chipui Henrique Rocha chu1-6, 6-4, 6-0-in a vaw tla ve bawk.
Germany ram Hamburg khaw tournament lamah No. 5 seed Arthur Fils of France pawh quarters lut zingah telin Serbian Laslo Djere lakah 7-6 (3), 6-2 hnehna a chang.
Kum 20 mi Fils kha kum 21 tlin hmaa Hamburg quarter-final lut thei player panga zinga pakhat niin, Novak Djokovic leh Mats Wilander-te hnung a zui a, 6-4, 6-3-a Argentina player Marco Trungelliti hnehtu No. 2 seed Holger Rune of Denmark lakah fiahna lian zawk a hmachhawn leh ang.
Top-seeded Alexander Zverev of Germany pawhin an ram tournament-ah hian Frenchman Hugo Gaston lakah 4-6, 6-2, 7-5 hnehna a sualchhuak a; No. 8 seed Zhizhen Zhang of China lakah Italy player Flavio Cobolli chu 6-1, 7-6 (5)-in a tlawm thung.
No. 3 seed Felix Auger-Aliassime of Canada pawhin season kal laia a vawilina atan quarter-final a lut a, chu hmun thleng tur chuan Switzerland ram tournament-ah 7-6 (6), 6-2-in Germany player Yannick Hanfmann a paltlang.
A tumkhatna’na clay title beisei mek Auger-Aliassime, hian 2018 champion Matteo Berrettini of Italy a tum leh dawn a, sixth-seeded Italian hian last eight a luhna kawngah 6-4, 6-2-in Daniel Elahi Galan of Colombia a hneh ve bawk.
Inkhel dangah Brazil player Gustavo Heide chuan No. 2 seed Ugo Humbert of France lakah 6-7 (2), 6-2, 6-3 hnehna chang, Frenchman Quentin Halys pawh Lukas Klein of Slovakia lakah 6-3, 6-7 (7), 6-4-in a chak.
Republic of Ireland ram khawpui pakhat Newport lama tournament kal mekah No. 2 seed Marcos Giron pawh 4-6, 7-5, 6-4-in Benoit Paire of France lakah a chak a, last eight-ah Australian Alex Bolt a tum leh ang.
Quarter-final match pahnih khelh tawh zinga pakhat zawkah No. 3 seed Alex Michelsen chuan 6-4, 6-4-in Aleksandar Kovacevic a hneh a; Reilly Opelka lakah Mackenzie McDonald chu 4-6, 6-3, 6-4-in a tlawm thung.