Hnehna nena Games bul tan Swiatek

Poland tana gold medal hlawhchhuak tura beisei Iga Swiatek chuan Paris 2024-ah chak chungin Olympic campaign a tan a, Inrinni khan Irina-Camelia Begu lakah fiahna tling paltlangin, Romanian lakah rim taka thawk chungin 6-2 7-5 hnehna a sualchhuak.
Polish world number one Swiatek hi kumin tiamin French Open title hnuhnung pathum hawn fai vektu a ni a, Roland Garros-a a chungnun vanglai takin he tlak lei sen chungah hian Olympic a khel a, Begu lakah awlsam takin tlang thei ta bik lo mah se Roland Garros khelmuala match 22 a chakzawnna ni tawhin, second round lamah Nadia Podoroska leh Diane Parry inkhela chak zawk zawk a tum leh ang.
Inrinni Olympic tennis tournament hmeichhe singles first round inkhel dangah Italy player Jasmine Paolini pawhin Romania player dang Ana Bogdan lakah 7-5 6-3 hnehna a chang ve hram bawk a, nikum French Open final-a Swiatek hneh loa runner-up ni ta Paolini hian kumin Paris Games-ah Swiatek laka phuba lakna hun tha nei turin hna hmasa a hlenchhuak. Swiatek hian Olympic gold awrh ve ngei a duh thu hi kuminah a lo sawichhuak tawh a, a khelmual hman thiamah Olympic gold lak theihna hun remchang a nei mek. Grand Slam title panga a lak tawh zinga pali hi Paris clay-a a hlawhchhuah a ni.