Mizo tobul

Art & Culture minister C Lalsawivunga chuan, Mizo tobul leh thlangtlak dan kimchang mumal taka sawrkar anga puan a la ni lo chu veiawm a tih thu a sawi a. He thu hi, kar kalta Zirtawpnia Pachhunga University College-a Department of History leh Art & Culture department tangdun buatsaih Mizo tobul chhuina symposium neihna a hmanpuinaah minister hian a sawi a. Ziaktu hmasate inpekna avanga Mizo chanchin hriat tur a awm chu lawmawm a tih thu sawiin, historian hmasaten sul an lo su tawh a, hemi behchhan hian tun aia fiah leh chiang lehzualin ziak ngeia dah theih tura tan lak a tul, tiin a sawi bawk.
Mi thenkhatin ‘Mizote hi hnam naupang tak kan ni’ tiin an sawi leh mai thin a, hei pawh hi kan tobul han malman fak tur kan neih that loh vang a ni pakhat awm e. Thlangtlak hun (tuna Mizoram ni taa kan luh hun) sawi dan pawh a inang lo zung a, AD 1700 vel anga sawi a ni thin a, hetih hunah te hi chuan, tun hnua khawvel thilmak pasarih zinga chhiar tel theih Taj Mahal (1631) an lo sa zo daih tawh; hetiang atanga kan inteh chuan ‘hnam naupang’ kan inti mai te pawh a lo ni ang e.
Tunhmain pawl hniam zawk zirlaibuah Mizote chu Chhinlung chhuak kan nih dan kan zir thin. Pûk pakhat atanga chhuak, hnam peng khat bengchhen avanga puk kawngka khar tak daih thu te, puk atanga chhuak tate kal zel, Khampat Bungpui phun hnuah, Run lui kana thlang tlaa tuna Mizorama inbawk khawm ta, tih vel chu Mizo history thenkhata kan hmuh dan a ni a. Puk chhung atanga chhuak duah duah han nih ngawt tak mai chu, a chauhthubarawhthlak hle awm e.
A nihna takah chuan, Mizote hi tunhmain hnam changkang tak leh fing tak kara khawsa thin kan nih a rinawm a, thiamhnang kan deh thiam dan te, kan silhfen, puan leh incheina ziarang te, ralthuam chi hrang hrang kan siam thiam dan leh ral rel kan thiam dante, thufing kan neih that dan leh environment, sik leh sa kan hriat dante han ngaihtuah hian, hnam mawl leh hnam naupang tak kan ni theiin a lang lo. Chuvangin, Mizo tobul chhui tur chuan kum hnih khat chhung leka peihfel mai chi a ni dawn lova, sawrkar anga hnam tobul puan a nih dawn phei chuan khawvel awm chhung daih tura rintlak leh belhchiandawl ni tura hmanhmawh si lo, muangchang si lova thapui thawha kan beih hi a ngai ta a ni ber mai.