India-in Bangladesh ngaihven reng

Bangladesh-ah politics ngelnghet a awm vat a beisei thu sawiin External Affairs Minister S. Jaishankar chuan India chuan dan leh hrai lekkawh a nih hma chuan minority te dinhmun a ngaihtuah takzet tiin a sawi a. Bangladesh buaina chu India political spectrum tena an ngaihven em em a ni tiin August 6 khan Rajya Sabha floor-ah a sawi.
Jaishankar chuan Bangladesh Supreme Court-in thutlukna a siam chungin lungawilohna kalpui zui zel a ni a ti a. “Lungawilohna chu agenda pakhatah inbawrkhawmin chu chu Prime Minister Sheikh Hasina chu a bang tur a ni tih a ni,” tiin a sawi bawk a.
“Security establishment te nena sawihona an neih hnuah PM Hasina chuan ban mai a remti ta a. Hun chep tak karah India a lo luh a dil a. Bangladesh thuneitute atangin flight clearance dilna kan dawng nghal a, nimin zan khan Delhi a lo lut a ni,” tiin Jaishankar chuan a sawi bawk.
Ram pahnih te chuan kum tam tak chhung sorkar hrang hrang a awm chungin inzawmna thuk leh danglam tak kan nei a ti bawk a. Jaishankar chuan Bangladesh chuan polarisation nasa zual zel, inthenhranna nasa tak January 2024 inthlanpui a neih hnu atangin a tawk a, chu mi boruak kal zel nen June thlaa zirlai lungawilohna lantir chuan a tizualkai ta a ni a ti bawk.
Tharumthawhnain hmun a chan mek lai hian India sorkar chuan insumkarna neia inbiakna hmanga harsatna chinfel a nih theih nan ngenna a siam a ni a ti bawk.
Bangladesh buaina thleng mekah Jaishankar chuan minorities te, an sumdawnna leh temple te chuan hmun hrang hrangah beih a tawk a, chhiatna thlen nasat dan chiah kan la hrefiah thei lo a ti thung a.
Bangladesh dinhmun chu la inlailang zel tur a ni ti bawkin India sorkar chuan Bangladesh-a Indian community te nen inbiak pawhna kan nei reng a ti bawk a. Tun dinhmunah Bangladesh-ah hian Indian nationals 19,000 vel an awm a, heng zinga 9,000 vel chu zirlai an ni a. Indian zirlai tam zawk te chuan July thla khan India an lo let hman tawh zawk tiin Jaishankar chuan a sawi bawk.
Union Minister chuan minorities te dinmun chu India-in a ngaihven reng thu sawi bawkin, “Group leh organisation hrang hrang ten minorities te Bangladesh buaina kara an him theih nan hmalakna an nei a, kan lawm em em a, tichung chuan dan leh hrai a nih tur anga lekkawh a nih leh hma chuan hlauhthawnna kan la nei a ni,” a ti bawk.
A hmain Jaishankar chuan all-party meeting neihnaah India chuan Thawhtannia India rama lo tlanchhia Bangladesh prime Minister hlui Sheikh Hasina chu tanpui a tiam tiin a lo sawi tawh bawk.
MEA officials te chuan Hasina chungchangah sawi an nei tam lo hle a, Hasina chuan India ramah asylum a dil em tih pawh an chhang duh rih lo bawk.
Hetih lai hian Bangladesh chuan interim sorkar a nei dawn niin Army Chief Hen. Waker-uz-Zaman chuan a sawi a. Interim sorkar din a nih theih nan President mai bakah Opposition party te bia in hma a la ang a ti a, mahse, Awami League, Hasina party te chu an biak rawn ve loh tur thu a sawi.