Hezbollah ten phuba lak tur thu puang

Iranian thlawp Lebanese group Hezbollah te chuan Beirut khawpuia Israel-in an senior commander a thahna chu phuba an lak tur thu an puang.
Fuak Shukr thih cham karkhat chiaha television kaltlanga thusawina a neihah Hassan nasrallh chuan Israel an chhanletna tur chu ‘a na ang’ tih leh ‘awmze nei a ni ang’ a ti a, inbeihna satliah mai mai a ni dawn lo a ti bawk.
Hezbollah-te chuan anmahni chauhin emaw Iranian thlawp helai region a faction dang te nen pawh an tanho mai theih thu a sawi bawk.
Hetih lai hian khawvel ram hrang hrang te chuan Hezbollah leh Israel te chu indo mai thei an nih avangin an khua leh tui te chu Lebanon chhuahsan turin an ti hlawm thung.
Iran pawhin Hamas political leader Ismail Haniyeh kar kaltaa Tehran a tihhlum a nihnaah phuba a lak tur thu a sawi bawk a. Hamas leh Iran chuan Israel an puh ve ve a, Israel lahin engmah sawi a nei lo thung.
Thawhlehni khan Israel chuan Hezbollah te military structure tia a sawi southern Lebanon a mi chu a bei bawk a. Israel chetna avang hian Israel ramri atanga 19 km vela Maifadoun ah mi paliin nunna an chan tiin Lebansese health ministry chuan a tarlang.
Heng mi palite hi Hezbollah fighter-te niin AFP news agency chuan a sawi a, an pali hian northern Israel chu drone hmanga beiin mi pahnihin hliam an tuar niin tarlan a ni bawk.
Maifadoun beih nan hian Israel chuan fighter jet te a hmang niin Israeli Defense Forces te chuan thuchhuah an siamah an tarlang a ni.
Hezbollah-te pawhin chhang letin Israel hi drone-in an bei zui a, hei vang hian Mazra’a khuaah mi pahnihin hliam an tuar nia sawi a ni bawk.