Durtlang rawlthar Sanga kutah badminton bronze

Durtlang rawlthar Sanga kutah badminton bronze
August ni 1-7, 2024 chhunga Odhisa khawpui Bhubaneswar-a khelh zawh tak Yonex-Sunrise All India Junior Ranking Badminton Tournament 2024-ah Durtlang rawlthar C. Lalramsanga s/o C. Lungmuanpuia chuan under-19 boy’s doubles category-ah bronze medal a vaw chhuak.
Badminton Association of India (BAI) hnuai din National Centre of Excellence (Guwahati)-a badminton zir mek Sanga hi Delhi lam mi Bhavya Chhabra nen inkawpin seeded number three an ni.
Round of 32-ah 21-16, 21-8-in Jayakrishna CV leh Mithes R tangdun an hneh phawt a; round of 16-ah erawh Varghese JK leh Aman Suresh SM inkawp lakah match khirh tak hmachhawnin deciding game hial an khel a, 20-22, 21-11, 21-15-in an chak hram.
Quarter-final lamah pawh seeded no 5 Nagesh Chamle leh Jayesh H lakah deciding game khelh ngawi zawng bawkin 9-21, 21-7, 21-13 hnehna nen an tlang hram a ni.
Semi-final match-ah thung chuan he tournament-a seeded no 2 Arsh Mohammad leh Shaskar Saraswat-te thiandun lakah harsatna lian tawk loin game khatna an la thuai a, game hnihna pawh an la leh teuh viau a, deciding game erawh chiang taka hlohin 21-11, 20-22, 14-21-in an tlawm a, Mission Veng Badminton Club (MBC) tana khel mek Mizo rawlthar Sanga hian a vawihnihna’n national level-ah bronze medal a lungawipui leh rih phawt a ngai!
Last eight paltlang zo lo |hazuala
Under-19 Boy’s Singles category-a inlan Chanmari Shuttlers Club chhuanvawr leh he tournament-a seeded no 9 ni bawk H. Lalthazuala chuan round of 64 atanga khel tanin, harsatna lian tham tawk loin pre-quarter final a invawkai.
Round of 16-ah seeded no 3 Neer Nehwal chu 21-19, 21-17-in a hneh a, quarter-final lamah seeded no 5 Shaskar Saraswati tum lehin, set khatna la mai thei dinhmuna a din hnuah inpawhthlak tirin, 19-21, 11-21-in a chak ta lo a ni.
He All India Junior Badminton Ranking Tournament 2024 hi September ni 30 atanga October ni 13, 2024 chhunga Nanchang, China a nghah tur BWF World Junior Championships-a tel thei tur zawnna pakhat atan hman a ni a; singles inelna bika quarter-final chin leh doubles category lama semi-final khel pha chinte’n tun August ni 10-13 chhung hian New Delhi-ah final seclection trial an hmachhawn ang a, chu ta an tlin chuan Sanga leh |hazuala hian China ramah India ai an awh thei dawn a ni.
Mizo naupangte an chechhe lo
Under-17 player ni mek Sainunmawia Sailo (Sihphir Badminton Club) pawhin mixed doubles-ah Ishita Negi nena tangdunin Bhubaneswar-ah khan tournament a hmachhawn a; qalifying round atanga bul tanin, pre-quarter final an invaw thleng. Saia hi tunah kum 16 mi chiah a la ni a, hmabak a nei eng hle a ni.
C. Lalramsanga (MBC) leh Lalrempuii (Ralte Villa Badminton Club)-te pawh mixed doubles category-ah an inlan a, round of 16 an inhlangkai thei bawk.
Mission Veng Badminton Academy-a intuaihriam mek Lalrinkimi pawhin qualification round atanga bul tanin, under-19 girl’s singles category a hmachhawn a, a vawikhatna’n main draw a invawkai thei a ni.
Lawmpuina leh lawmthu
Tuntum tournament chhim tur hian mi 1002 zetin hming pelut mah se inelna hmachhawn tak chu shuttler 797 an ni a, chuti taka India rama kum bithliah badminton inelna lian national level-a Mizo player-te sulhnu thar chuan Mizoram Badminton Association (MBA) a tihlim hle a, ta bik takin Sanga’n lawmman pathumna a la phak hi ropui tiint, an chhuan takzet thu an tarlang.
He tournament hmachhawn Mizo thalai dang zawng zawngte khelh danah pawh MBA chuan hmasawnna a hmu a, an hma lam hun atan theihtawpa an in buatsaih zel theihna’n te, hmasawnna nasa zawk an neih chhunzawm theihna’n leh hriselna tha zawk an neih zel theihna’n tawngtaiin an dil sak a, duhsakna sang ber an hlan nghal bawk tih an thuchhuahah chuan hmuh tur a awm bawk.
MBA chuan Mizo naupang leh thalaite’n hlawhtlinna an chan chhoh zel theih chhan chu TATA Trusts (NEIDA) nena an thawhhona rah a nih thu tarlangin, “An zarah grassroot centre hmun hrang hrangah din niin, Regional Competitive Training Centre leh Pullela Gopichand Intensive Training Centre (PGITC) thlengin min duansak a, chuta tanga hlawhtlinna hmu chho zel chu kan nih avangin an chungah lawmthu kan sawi tak zet zet a ni,” tiin thuchhuah an siam.