MIZO TAWNGA ZIAK HMANNA

Dr. Lalzuia Colney
PH. No. 9862334371
Lower Kanan, Aizawl.

Mizo tawnga ZIAK (Write) hmanna chungchangah hian inhnial deuhna a awm fo a, tun tumah hian a hre fuh duh tan an hriat chian theih nan ka han ziak ve leh dawn a ni. Pu Vulmawia, Vice President, Mizo Grammer Society chuan MUP Tlangau July 2024 chhuakah chuan thumal ZIAK tih hi vawi 50 vel a ziakah chuan ZIAH tiin a ziak vek a, ZIAK tih hi a dik lo a ti ani ber ang. Kei pawh han ti ve hram ila, Middle School-ah leh High School-ah Mizo tawng Subject lain, pension thak ka ni a. Ka thawh ve lai chuan MAL-ah pawh Committee hrang hrangah ka awm ve tawh a, MBSE-ah pawh Mizo Subject zirlaibu buatsaihtuah te min hmang ve tawh a, chutah chuan ZIAK tih turah eng Mood-ah mah ZIAH tih kan hmang ngai lo. Saptawnga WRITE tih chu Mizo tawngah chuan ZIAK kan ti zel thin.
Mi thenkhatin ZIAK tih chu ZIAH tiin an modify fo thin a, hei hian kan thalaite pawh a hruai sual tan ta a ni. Mizo tawnga ZIAH hmanna chu lam rik dan a ri sang leh ri ri lai a awm a, chutiang chu entir nan han sawi ila:
1. Zu hi in ZIAH suh.
2. Chawlhniah chuan inkhawm ZIAH rawh.
3. Zawngtah i ZIAH zawh hunah kan ei ang.
4. Hnung thak hiah nan ZIAH mai a tha.
Hengte hi ZIAH hmannate chu a ni.
ZIAK (Write) hi ZIAH ti lui tlat an awm fo va; chuvangin, kimchang deuh takin han sawi law law ila, la hre thiam lo an awm palh pawha an hriat thiam tawh nan, chhiartute pawhin lo chhiar hram teh u. Mizo tawnga Bible letlingtuen uluk tak leh fimkhur takin Mizo tawng an hmang a, Bible letlingtute hi mithiam, Sap tawng leh Mizo tawng mai pawh ni lo Theologian lamah pawh Kohhranin hmantlaka an ngaihte an ni a, ZIAK (Write) hi vawikhat mah ZIAH an ti ngai lo. Chu chu a dik ngei a ni tih kan hriat theih nan Bible ziak dan hi lo en ila.
Exodus 31:18, Pathian kutzunga ZIAK chu. Chronicle 23:18, Mosia dan bua a ZIAK ang. Nehemia 10:34, dan bua ZIAK angin. Thufing 22:20, hriatna tha tak ka ZIAK, Sam 40:7, ka thu ziak a ni. Jeremia 17:1, hmawrzumin ZIAK a ni. Marka 9:12, Mihring fapa….ZIAK a ni. Luka 10:20, vana in hming ZIAK a nih. Johana 19:22, ka ZIAK kha ka ZIAK zo tawh. Joh.20:30, He lehkhabuah hian ZIAK a ni lo. Tirh.13:33, …….. tih ZIAK ang bawk khan.
Rom 15:4, hman laia ka ziak apiangte chu. Exodus 17:14, lehkhabuah ZIAK la. Exodus 14:1, ka ZIAK leh ang e. Deut. 6:9, in kawngkharahte in ZIAK. Deut, 11:20, kawngkharahte in ZIAK. Deut. 17:18, dan hi lehkhabuah a ZIAK. Deut. 27:3, he dan thu hi in ZIAK….. Thuf. 7:3 I thinlung phekah ZIAK rawh. Jer. 30:2, lehkhabuah ZIAK rawh. Hosea 8:12, ka dan chu ka ziak sak. Hab. 2:2, Lungphek chungah Ziak rawh. eb. 8:10, An thinlungah ka ZIAK bawk. Heb. 10:16, an rilruah ka ZIAK bawk. I Joh. 5:13, ….. heng thu hi ka ZIAK a ni. Thu. 1:19, thu chu ZIAK rawh. Thup. 3:12, ….. ka hming thar nen ka ZIAK vek a. Deut. 31:9, Mosia chuan ….. chu a ZIAK a. IIPet. 2:1, 12,….in hnena a ZIAK ang khan.
Hetiang hian kan Bible-ah pawh khawiahmah ZIAH a hmang lo, Chuvangin, Mizo tawng dik hman tum chuan ZIAK hi ZIAH tih loh tur a ni. Ka Ziak kha ka ZIAK zo tawh a nih hi.
Hetiang hi Mizo tawng dik leh a ziak dan dik an hman dan chu a ni a, tun laiah mahni duh dan emaw, mahni ngaihdan emaw hmanga Mizo mipui min hruai sual tum hian inenfiah rawh se.