Israel-Hamas inkahhai rawt nawn

United States, Egypt leh Qatar te chuan thuchhuah intawm siamin Israel leh Hamas te chu inkahhai leh mitang chhuah a nih theih nana inbiakna chhunzawm turin an ngen.
Ram pathumte thuchhuah intawm siam chuan ‘framework agreement’ siama ‘chinfel loh thil la awm te chingfel turin’ an ngen a.
Israel chuan inbiakna a awm theih nan palai a tirh tur thu sawiin August 15 ah Doha emaw Cairo ah emaw inbiakna neih tur a ni a, Hamas te chuan engtinmahin chhanna an la siam lo thung.
Tuna diplomacy hmanga hmalakna thar ber hi Middle East region a buaina nasa zawk a chhuahloh nana hmalakna niin Hamas leader Ismail Haniyeh karkalta tihhlum a nih hnuah buaina nasa zawk a chhuah hlauhna a lian hle a. Iran chuan Israel chu na taka demin phuba a lak tur thu a sawi a, Israel chuan Haniyeh chu a tihhlum a nih leh nihloh thu engmah a sawi duh lo thung.
Ram pathum thuchhuah intawm siam chuan Israel leh Hamas te chu August 15 ah inbiaknaa tela inremna siam tura la tihfel loh tinte chingfel turin a sawm a.
“Palai nih angin party tin tena beiseina neih chinfel a nih theih nana thu inchuh la awm la chinfel loh te chinfel a nih theih nan rawtna hnuhnung kan siam a ni” tiin an sawi.
He thuchhuah intawmah hian US President Joe Biden, Egyptian president Abdel Fattah el-Sisi leh Emir of Qatar Sheikh Tamim bin Hamad Al Thani ten hming an ziah hnan a ni.
Framework agreement siam chu 31 May a US President Joe Biden an ‘principles’ a siam behchhana siam a nih thu sawiin inkahhai mai bakah mitang chhuah tawn ni se tih a ni a, he rawtna hi UN Security Council pawhin a lo pawmpui tawh a ni bawk.
US Defence Secretary Lloyd Austin chuan Israeli Defence Minister Yoav Gallant bia in Middle East region a forces an thlak danglam dan hrilhin Israel humhim chu US in a tum ber thu a hrilh bawk a.
“Chutihrual chuan Gaza a inkahhai leh mitang chhuah a pawimawhzia pawh ka hrilh a ni” tiin a sawi.
|um tam inbiakna neih a ni tawh chungin Gaza indonaa inkahhai leh mitang chhuah chungchangah Israel leh Hamas te chuan inremna an la siam thei lo a ni.
Hamas te chuan inkahhai an duh a, mahse Israeli Prime Minister Benjamin Netanyahu chuan buaina chu Hamas te hneha an awm hma chuan a tawp dawn lo a ti bur thung.
Israel chuan Gaza Strip bomb chhunzawm zelin Hamas te chuan Israel bomb in school pahnih dengin mi 18 chuangin nunna an chan an ti a Israeli military te thung chuan Hamas command centres an bomb an ti ve thung.
Hamas tena Haniyeh thlak tura Yahya Sinwar leader atana an thlang bawk chuan inremna a awm theih nana inbiakna chu a tikhirhkhan zual dawna ngaih a ni bawk.
Sinwar chu 7 October attack mastermind tu nia ngaih niin Hamas ah pawh firfiak bera ngaih a ni.