Taylor Swift concert-a mi tam tak thihchilh tumtu inpuanna

Vienna, Austria-a Taylor Swift-i’n zan thum chhung Eras Tour concert a neih tur chu concert neih hma ni chiaha police ten buaina chawh chhuah tum an man avangin thulh a ni a, police ten an man tak hian a inpuannaah mipui a tam thei ang ber thihchilh a tum niin police ten an sawi.
Vienna police ten mipahnih an man zinga pakhat, kum 19 mi chuan Vienna, Austria-a event lian zual chu beih tumin an inpuahchah tih a puang a, chung an target zingah chuan Taylor Swift zan thum Eras Tour concert neih tur pawh a tel.
Police ten an man kum 19 mi hi primary suspect tiin an sawi mai a, ani ian chemte leh puakthei hmanga mipui a tam thei ang ber thihchilh a tum thu a inpuang niin an sawi a, Austria-a Directorate of State Security and Intelligence-a an hotupa Omar Haijawi-Pirchner chuan an miman hi Austria khulehtui, Nort Macedonian lam thisen kai niin a sawi a, a apartment atangin, hydrogen peroxide, bomb siamchawp leh bomb tihpuahna (detonator) leh detonator cable te an hmuchhuak niin a sawi bawk.
Police te man midang zawk pawh hi rawlthar kum 17 mi, Austria khualehtui tho niin, Turkish leh Croatian thisen kai a ni ve thung a, ani hi Vienna-a Taylor Swift show neihna tura company lamin an rawih zinga mi a ni a, a inah Salafi-jihadist group ISIS kaihhnawih thil an hmuchhuak a, Al-Qaeda nena inzawmna nei thil hmuhchhuah an nei bawk.