Chhe lo, thluak tha leh tlan chak- Gaby Thomas

Paris Olympics 2024 a hmeichhe metre 200 intlansiaka gold medal latu chu tudang ni lovin, American nula Gabrielle Thomas, kum 27, a ni a, second 21.83 chhungin a tlan thleng hman. Gaby Thomas hi a tlan chak a ni satliah mai lova, feet 5 leh inches 10 a sang niin, supermodel hmel leh pian a nei a, chutah a thluak a la tha hle bawk. Harvard University atanga neurobiology and global health a graduate, University of Texas Health and Science Center atanga epidemiology a master degree nei a ni nghe nghe.
Gaby Thomas hi Olympics-a a vawi hnih telna niin, 2020 Tokyo Olympics-ah khan 200m intlansiakah bronze medal a dawng a, 4x100m-ah silver a dawng tawh bawk. Tun hi Olympic gold medal a dawn vawi khatna a ni.
Gaby Thomas hian 200m hi second 21.83-ah a tlan thleng hman a, gold medal dawngin, Saint Lucia tlan chak Julien Alfred-i’n second 22.08-ah thlengin silver medal a dawng a, Brittany Brown, USA-in second 22.20-ah thleng hmanin bronze medal a dawng ve thung.