Ration Card neih kawp…

Tun lai chu thil dang a leng thei lo, ration card var chungchanga inpuhmawhna leh Phuldungseia ration card neih kawp chungchang chuan social media leh news media hrang hrangah hmun a luah zau hle.
Tun hnaiah adviser to chief minister (Political) chuan Phuldungsei tlawhin, Tripura leh Mizoram ration card nei kawpte chu, Mizoramah chauh ration card nei turin a sawm a. Mizoram mi an nih avanga Tripura lama ration card nei tawh loa, Mizoram lama nei vek tura an duh thu a sawi a.
India ram puma One Nation One Ration card kalpui mekah India ram hmun dangah pawh ration card thliarfel hna hi thawh mek a ni a. Phuldungsei chauh ni lo, Mizoram hmun dang amite pawh hmunkhat aia tama awm kawpte chu thliarfel an ni. Tripura leh Mizorama neih kawp talh duh an nih pawhin, kawng danga an neih theih dan tur (manual ration card) ngaihtuah pawh Mizoram sawrkar chuan a inhuam, ti hialin adviser to chief minister hian a sawi nghe nghe a ni.
State pahnih hminga Ration Card neih kawp hi danin a phal lova, chuvanga a thliarfel hna pawh tunah hian thawk mek an ni a. Dan chu dan a ni a, dan chuan a kawng a zawh mai tur a ni. Ramri hrula chengten dan kalha ration card neih kawp an lo tum a nih pawhin, “Danin a phal lo e, nangni chu Mizoram mi in ni a, Mizoram ration card in nei vek tur a ni. Ramri bula awm avangin state dang ration card neih kawpna dan a awm lo, dan bawhchhiatna a ni” tia ramri hrula chengte hrilhfiahtu tur chu sawrkar thuneitute an ni.
Tuna Tripura nen helai tlangdung kan inrina vela kan buaina hi chu, Assam nen ramri-a buaina kan nei mek nen a danglam deuh a. Helai velah hi chuan ramri hrula chengte inchuhna boruak hi tunhma atanga lo awm tawh a ni a, identity inpeksiak leh, ram chin hauh nana hmunhma inchei-hnum-siak hi kan innek dan ni deuh rohin a lang. Tuna thil thleng mek erawh hi chu, a mi chengte dinhmun himna tura ngaihdan inchuhna lam ai mahin, politics thila chan tha zawk chan inchuhna boruak lam a pawl deuh niin a lang.
Eng pawh ni se, Mizoram mi chuan Mizoram ration card nei mai se, Tripura lam ration an lak tel ve talh theihna tur lam ngaihtuah hran pawh a ngai lo. Ramri hrula chengte hi chu, a bika enkawlna lo dawngin duat lo hlawh deuh pawh ni se, thik tur pawh an ni lo. Ramri leh ramri hrula chengte a bika ngaihven deuh hi chu ramri humhalhna atana strategy pawimawh tak pakhat a ni ve awm asin.