Diamond League-a inlan tum Chopra

Thar bawr na dam chiang hlei thei loin tibuai ve deuh reng mah se India double Olympic medallist javelin thrower Neeraj Chopra chuan August ni 22 hian Lausanne khuaa athletisc inelna lian Diamond League-ah tel a tum tih a nemnghet a, Paris Olympics zawh rual khan Switzerland ramah training a kalpui chho leh nghal.
A tha thei ang bera season khar a duh avangin Paris 2024-a silver medal awrhtu hian Paris Olympics zawhah chawlhhahdamna hun pawh a la nei mumal thei lo a, kum thum liamta Tokyo Games-a a gold hlawhchhuah kha Paris-ah humhim zo lo mah se inthlahdah tum loin khawng zawka kirleh a tum thu nimin khan online kaltlanga an kawmnaah sawiin, Lausanne Diamond League-ah fei khawh leh turin training a bei ngawrh leh hle tawh tih a sawi.
September ni 13-14 chhung hian season kharna Diamond League chu Brussels khawpuiin a thleng dawn a, he mi zawh lamah Chopra hian a thal bawr dam chiang hlei thei lo chungchangah doctor a rawn dawn tih sawiin, zai hial a ngai mai thei niin a sawi.
“Ka thal na enkawlna hnuhnungber tur chu season tawp atan ka khek a, chu mi turin thlakhat hun a la awm a, season zawh hmaa inelna hmachhawn zui hram hram thei turin theihtawpa ka indim a ngai dawn a, chu mi zawh lamah doctor rawn tur ang ang ka rawn chho tawh ang,” a ti.
Paris-ah pawh khan a thal harsatna chuan a kiansan lo tih tarlang telin, physio Marwaha chuan a enkawl reng niin a sawi a, lawmthu sawi nghalin, “Kum 2017 atang khan kan thawkdun tawh a, ka hliam min enkawl a, zai ngai min zai a, a chungah hian ka lawm hle a ni,” tiin.
Kum 26-a upa Chopra hi nikum World Championships-a gold medal a lak hnu khan hliamin a tibuai chho ve ta reng a, Brussels khuaa season kharna intihsiak lian hmachhawn thei turin Diamond League Meetings series kal mekah hian top-six a luah phak a ngai dawn a ni.
Summer Games hnuhnung pahnihah Chopra hian medal la ve ve thei mah se kum thum kalta Tokyo Games-a a gold awrh kha Paris-ah a hum zo lo a, Pakistan palian Arshad Nadeem chuan metre 92.97 zeta thui khawhin Olympic record thar nen Chopra kut atangin gold a chhuhsak a; Paris-a 89.45m bak pel zo lo Neeraj hian metre 90 khawh thlen tlin a tumna a la puitlin zo lo ta zel rih a ni.