Stree 2’-in ni 4 chhungin vbc 142 la lut hman

Horror-comedy movie ‘Stree’ chhunzawmna, Bollywood star Shraddha Kapoor channa ‘Stree 2’ chu box office-ah beisei phak bakin a chetha a, ni li chhungin India-ah cinema hall ticket hralhna atangin cheng vaibelchhe 142.82 a la lut thei a, ramdanga a lak luh te nen chuan cheng vaibelchhe 199 a tlin der tawh bawk.
He film thar hi critics leh film entu te pawh review an pe tha viau a, an tlangzarh atanga ni thum chhungin cheng vaibelchhe 135.55 a la lut man a, a ni li-naah cheng vaibelchhe 7.27 la lut lehin, ni li chhungin vaibelchhe 142.82 a la lut thei.
Chanderi khua chu ramhuai lubungin a tibuai hle mai a, zanah hmeichhia a rubo thin. Vicky (Rajkumar Rao) leh a thiante (Pankaj Tripathi, Abhishek Banerjee, leh Aparshakti Khurana) chu Chanderi khua chhanhim turin an thawkchhuak leh ta a, tun tum chu Shraddha Kapoor-i’n a tawiawm ve ta a, Shraddha character hi ‘Girl With No Name’ tih a ni a, ani hian Vicky te thianho chu Chanderi khua chhanhim a, ramhuai lubung hnenah turin hun tam an nei tawh lo tih a hrilh a. Tichuan heng thianho leh ramhuai lubung inbeih dan vel tarlanna a ni.
Stree 2 hi Amar Kaushik direct niin, horror leh comedy inpawlh, a changa han phut deuh zawk zawkna tur awm, a changa han hlimpui viau tur chi awm bawk hian ngainat a hlawh riau a, cheng vaibelchhe 50 vel senga siam niin, opening day-ah India-ah cheng vaibelchhe 83.48 a la lut thei a, kumina Hindi film tlangzarhah chuan opening day-ah la lut hnem ber a la ni a, kumin chauh ni lo, Hindi film tlangzarh tawh zawng zawngah pawh opening day-a India-a sum la lut tam pahnihna a ni pha a, 2023-a tlangzarh ‘Jawan’ chiah a pha lo.