Mobile phone chi hrang lakhawm hnem ber

Thlalak i en hian khawilai mobile phone zawrhna dawr emaw i ti ngawt ang e, Spanish Nokia superfan Wences Palau Fernandez-a chenna in a nih hi! Ani hian mobile phone chi hrang hrang 3,615 a la khawm tawh a, mobile phone lakhawm hnem ber record a siam.
Wences hian a mobile phone lak khawm te hi Barcelona-a a chenna inah a dah khawm a, a hmaa hetiang record siamtu chu Romanian Andrei Bilbie Argentis niin, ani hian 2023 khan mobile phone 3,456 la khawm tawhin record a siam a, mahse, he record hi Wences hian a rawn khum ta a ni.
Wences hian 1999 Krismas khan Nokia 3210 chu Krismas thilpekah a dawng a, 2008 atangin Nokia phone chi hrang hrang a lakhawm tan a, tunhma lama a lei theih loh model zawng zawng pawh neih vek a tum a, a collection a pung a, a dahkhawmna pawh a khat ta mai a. 2018-ah chuan Nokia model chi hrang hrang 700 chuang a lakhawm der tawh a, Nokia bakah brand dangah pawh huang a zauh ta zel a, tuna chuan Siemens, NEC, Motorola, Blackberry, Samsung, HTC, Apple leh brand dang dang a lakhawm ta zel a ni.
A phone lak khawm thenkhat hi chu a bika siam, limited edition te a ni a, Nokia 3220 Star Wars Ep III collection te pawh a tel a, Yoda, Starfigter, Obi-Wan Kenobi, Cyborg leh Padawan version te pawh a collection-ah hian a tel.
Wences chuan, “Ka collection-ah model hmuh tur vang tak tak te pawh ka nei a. Nokia bik hi chu neih kim vek ka tum a, Nokia hian model 1000 chuang an nei a, tunah 700 chuang ka lakhawm tawh,” a ti.