|halaite hmakhua leh ram hmakhua…

9th. Mizoram Legislative Assembly Session vawi thumna neih zawh takah khan thalaite hmakhua sut kuakna tur dan siam thar a ni a, chu chu tuna chief minister ni mekin, sawrkarna an chan huna kalpui a tum, ‘Guarantor-ah sawrkar a tang ang’ tih vawi duai lo a lo sawi lawk tawh tihhlawhtlinna Bill a ni deuh ber awm e. Chu chu “The Mizoram Ceiling on Government Guarantees (Amendment) Bill, 2024” tih a ni.
Hemi chungchang hi India Independence Day vawi 78-na lawmna Aizawl Lammuala neihah chief minister hian a lo sawi lawk tawh a; “The Mizoram Ceiling on Government Guarantees Act, 2011 chu siam danglam a ni a. He Scheme hnuaiah hian loan cheng nuai 50 chin la duhtute tan sorkar hi Guarantor-ah a tang dawn a, a pung (interest) pawh sorkarin a tumsak dawn a ni. Hetiang scheme hi India ramah a nei awmchhun niin kan inhria,” tiin a lo sawi tawh a nih kha.
He dan siam thar hi dan awm sa (The Mizoram Ceiling on Government Guarantees Act, 2011) siamthatna (amendment) a ni a, Section 4, sub-section (2) her danglam ‘zeuh’ a ni. Dan siam danglamna thumal tlemte hian thalai tam tak hmakhua nasa takin a su êng thei dawn ta niin a lang.
Tunhmaa Guarantor-a sawrkar a tanna Public Sector Undertakings (Mamco, Mifco, Zidco etc.) te khan loan an rulh theih thin loh avangin sawrkarin a rulhsak a ngai thin a. Chuvangin, “No Government guarantees shall be given in respect of any loan of any individual, private institutions or private companies” tiin dan siam a ni ta a. Chu chu tuna Amendment-ah hian, a awm sa tidanglam chuang lovin sentence khat belh a ni a, chu chu: “Provided that on merit the Government may decide to grant the guarantees to individuals, private institutions or private companies” tih a ni ta a ni.
Kan state hian state dang angin economy chawikanna tur industry liantham kan nei pha lo a, kan tih theih tawk Micro Small & Medium Enterprise lamah pawh hmasawnna tur khawp buaipui turin bultanna a lo harsat avangin helamah pawh hian kan thuanthu hle a. |halai lehkhathiam leh thiamthil nei tha tak takte pawhin bultanna an neih loh thin avangin thalaite hian an theihna leh thiamnate hi an phochhuak pha lo, a tih theih ang.
Tunah chuan, food processing lamah ringawt pawh thalaiten eizawnna tha tak an siam theih phah tawh dawn a, chu chu state economy-a contribution tha tak a tling theiin a rinawm a ni.
Tuna dan thar hian thalai tam tak dinhmun a chawikan chuan, chu chu state dinhmun chawikanna a ni nghal a, human resource development a ni ang a, thalai hmakhua kan sial that chuan ram leh hnam hmakhua sialna zel a ni.