Subroto Cup 2024 atangin Mizoram an tla

Bengaluru a khelh mek 63rd Subroto Cup International football tournament-ah Ningani khan Mizoram chu CBSE lakah si hnih faiin an tlawm a, knock out round lut zo lovin an tlan.
Mizoram leh CBSE te hi vawi hnih khela chak zawn a, point ruk hmu ve ve an ni. Ningani tlai khan Group champion nih an inchuh. He inkhela chak zawk zawk hian knock out round an lut dawn. Inkhel pawimawh takah hian Mizoram in tlawm an pumpelh a, draw result an nei thei a nih chuan tlang zawk tur an ni. Heti a nih vang hian dinhmun tha zawkah an ding a, tlang thei turin CBSE tan chak ngei ngei a ngai thung.
Chak ngei ngei an ngaihna inkhelah CBSE hian si hnih faiin hnehna an chang. Mizoram in an si phurh an sut thei loh vangin knock out round an lut zo lova, uiawm takin an tla ta a ni. Mizoram hian an khelh hmasak berah 6-1 in Tripura an hneh a. An match hnihnaah Haryana chu 13-0 ngawtin an hneh zui leh. Heng inkhel pahnihahte hian Mizoram captain Lalvohbika chuan goal sarih ngawt a thung. An group awm Bihar in inelna an hmachhawn loh vangin beisei aia hmain group champion tur tihchian a ngai a, Mizoram chu vanduai zawkah an tang a. Point 9 hmuin CBSE hi an tlang zui ta a ni.
Mizoram team hi an vanduai a, an si nghak pahnih
Benjamin Lalrinkima leh Lalmalsawmtluanga ten bone test an paltlang zo lova, inelna an hmachhawn thei lo. Si nghak tel lovin inelna pawimawh an hmachhawn a ngai a. An match hmasa pahnihah chetha viau mah se CBSE lakah an tlo zo lova, hlauhthawn ruk ang ngeiin goal hnih an chhuah a, an tla zui ta a ni.
Kum kal meka kum bithliah inelnaah Mizoram an chetha lo rih viau. Nationa Junior Boys-ah group stage an paltlang zo lo va, Junior Girls phei chuan khel 3 atangin si 32 ngawta n phur a, an mualpho chiang hle. Heti khawpa hmeichhe team an chak lo nasa hian sawizui pawh a hlawh viau. Junior National championship khel hun tur a chian hmain hi Subroto Cup leh NCC intihsiaknaa Mizoram aiawh tur thlan fel an ni a. Subroto Cup khel tura thlan team te hi National championship hmchhawn zui leh tura ruahman a ni. Subroto Cup leh Junior national championship khel hun a inrual leh tak si vangin chawpchilh takin Mizoram aiawh tur thlan leh chuk chuk an ni a. Mizoram team thumna ang an lo ni tawh bawk nen chetthat a har zui ta a ni.
National level-ah beisei an phak loh hnuin Subroto Cup lamah group stage paltlang zo lovin Mizoram an tla zui leh. National Sub-Junior inelna hmachhawn turin Sairang-ah Camp neih mek a ni a, mipa leh hmeichhiain inbuatsaihna an nei mek. Anni team hnihte hi Mizo hmel lanna tur an ni.