International badminton bronze la thei hmasaber C. Lalramsanga of Durtlang

International badminton bronze la thei hmasaber C. Lalramsanga of Durtlang
August ni 20-25, 2024 chhunga Hyderabad khawpuia Kotak India Junior International Series 2024 khelh zawh takah Durtlang rawlthar C. Lalramsanga, s/o C. Lungmuanpuia chuan Under-19 Mixed Doubles category-ah bronze medal a dawng a, Mizo zinga international level badminton tournament (junior)-a medal la thei hmasa ber niin, Mizoram badminton tan history a siam.
Mission Veng Badminton player Sanga hi vai tleirawl Pragati Parida nen an inkawp a; semi final thleng turin round of 32 lamah 21-13, 21-8-in an chipui NS Chauhan leh Liza Taank an hneh.
Quarter-final stage-ah pawh Indian pair bawk tum lehin, Arsh Mohammad leh Mizo tleirawl Lalrempuiite tangdun lakah 10-21, 21-18, 22-20 hnehna an sualchhuak leh.
He tournament-a thil chhinchhiah tlak tak chu international level badminton tournament lian last eight stage-a Mizo player an intum hi a ni.
Semi-final a ni a, Ramsangate thiandun hian he tournament-a seeded number one Thai pair Attawut Sreepeaw leh Pannawee Polyiam tangdun an su a; chuti chungin first game chu 22-20-in an la a, second game hi an tumpuite’n 21-14-in an rawn la ve leh a; deciding game khelh a ngai a, inhneh tawk taka an innawrtawn zak zak hnuah Sangate hian 18-15-in hma an hruai hman!
Dinhmun tha zawka an din hnuah inpawhthlaktir lehin, 22-20-in a chak lo zawkah an tang ta tlat a, bronze medal-ah an lungawi a ngaih phah ta a ni.
He Junior International Series badminton tournament lianah hian Ralte Villa Badminton Club tana khel mek Serchhip player Lalrempuii leh a partner Arsh Mohammad-te paw’n Under-19 Mixed doubles category-ah tho quarter-final an thleng a, Mizo hmeichhe shuttler thlen chin hi a hniam lo.
He round thleng tur hian round of 32-ah Chinese Taipei lam mi Yan Bin Huang & Lin Yun An-te tangdun chu 21-17, 21-17-in an hneh a; round of 16-ah Ashish Grag & Krishika Mahajan (IND)-te chu 21-12, 18-21, 21-16-in an hneh leh bawk.
Quarter-final match-ah lamah erawh Ramsanga leh a partner lakah an vanduai ta a ni.
International level tournament-a Mizoram tana medal la thei hmasa ber Ramsanga leh quarter final thleng thei Rempuiite an nei chu Mizoram Badminton Association (MBA)-in ropui a tiin a chhuang takzet tih thuchhuah siamin an tarlang a, an tournament khelh leh zel tur atan duhsakna an hlan nghal bawk.
Naktuk, Thawhlehni atang hian Pune lamah international level tournament lian khelh chhunzawm leh nghal tur niin, Yonex-Sunrise India Junior International Grand Prix 2024-ah hian Mizo naupang pali an inlan dawn.
Tournament hi August ni 27 atanga tanin, September ni 1-ah zawh a ni ang.

He tournament-a Mizo inlan turte chu :-

H. Lalthazuala, Under-19 Men’s Singles-ah main draw a lut sa.

Lalrinkimi, Under-19 Women’s Singles-ah qualifying atangin a khel tan dawn.

Lalramsanga, Under-19 Men’s Doubles-ah a partner nen seeded no 6-na an ni a, Under-19 Mixed Doubles-ah seeded no 4-na an ni bawk.

Lalrempuii, Under-19 Women’s Doubles-ah seeded no 4-na an ni a, Under-19 Mixed Doubles-ah main draw an lut sa bawk.

Tournament lian hmachhawn tur kan Mizo shutter-te hi MBA chuan duhsakna a hlan.