US Open hmeichhia Champion lai Gauff chak nghal

Thawhtannia khelh tan tak kum khat chhunga grand slam tournament hnuhnungber US Open hmeichhe singles champion lai Coco Gauff chuan French nula Varvara Gracheva laka 6-2 6-0 hnehna nuamsa changin Arthur Ashe Stadium-ah bul a tan.
American kum 20 mi hian nikum Flushing Meadows final-ah Aryna Sabalenka hnehin a career-a a Grand Slam title hmasaber a hlawhchhuak a, kumin major tournament pahnih Australian Open leh French Open-ah semi-final a thleng bawk.
Tunhnai chho hian a khelh that thinna a hloh titih rih tlat a, Paris Olympics-ah khan third round a paltlang zo lo a, New York tournament lian inbuatsaihna Cincinnati leh Toronto-ah a tla hma hle bawk.
US Open-ah erawh harsatna tawk loin bul a tan ta phawt a, second round-ah German veteran Tatjana Maria a hmachhawn leh ang. Kum 37 mi Maria hian firs round inkhel dangah 6-2 6-3-in Argentine qualifier Solana Sierra a paltlang ve bawk.
Champion tura rinkai dang second seed Aryna Sabalenka pawhin Thawhanni zan khan Louis Armstrong stadium lamah bul a tan a, Australia nula Priscilla Hon lakah 6-3 6-3 hnehna changin, nikum final-a a chak loh phuba la thei tura zinkawng hmasaber a hlenchhuak phawt.
Belarusian hian nikuma final a thlen bakah kum 2021 leh 2022 khan New York tournament-ah hian semi-final a lo lut tawh bawk a, second round lamah Italian Lucia Bronzetti a tum leh ang.
Australian Open title vawihnih la tawh Sabalenka hi Thawhtanni zan khan New York mipuiin an tan hle a, Australian Hon tan a lian mah mah a ni.
Kumin kumtir Australian Open final-a Aryna Sabalenka laka tlawm Zheng Qinwen pawh Thawhtanni zana chechhuak zingah telin, Olympic champion Zheng hian set khatna hloh zet chungin world number 50 Amanda Anisimova lakah 4-6 6-4 6-2 hnehna a chang.
Chinese seventh seed Zheng hi Louis Armstrong stadium inkhela rinkai zawk ni mah se first set-ah a talbuai laih a, mahse, insiamthain hnehna nen bul a tan a, champion tum tana paltlang ngai zingah a tel chhunzawm thei rih phawt!
Australian tleirawl kum 16 mi lek Iva Jovic chu New York khaw tournament ni khatnaa inlehthalna lianber thlentu niin, world number 40 Magda Linette laka 6-4 6-3 hnehna a channa inkhel kha WTA match-a a chak vawikhatna a ni nghal.
France nula Clara Burel pawhin ‘comeback victory’ changin 2017 champion Sloane Stephens lakah chiang fahranin set khatna hloh mah se 0-6 7-5 7-5 hnehna nen second round a lut a, he hmuna tum thum ngawt runner up lo ni ve tawh Victoria Azarenka lakah thilmak a beisei zui leh thei ang.
Belarusian Azarenka hian an ramin Russia thlawpa a do pui mek Ukraine atanga lo kal Yulia Starodubtseva chu 3-6 6-1 6-1-in a paltlang ve bawk.
12th seed Daria Kasatkina lakah Romanian Jaqueline Cristian chu 6-2 6-4-in a tlawm a; Ukrainian 27th seed Elina Svitolina chuan set thum khelhah Maria Lourdes Carle of Argentina hnehin, Wimbledon champion Barbora Krejcikova pawh tlang zingah a tel a, Spanish qualifier Marina Bassols Ribera lakah 7-6 (7-3) 6-2 hnehna changin, American 13th seed Emma Navarro lakah minute 59 lek chhungin Anna Blinkova chu 6-1 6-1-in a tlawm fel hman!
Maria Sakkari chu top-10 player zinga tla hmasaber niin, ninth seed tlawm chhan erawh hliam vang a ni a, Wang Yafan nen an inkhelh laiin set khatna lekah dar leh nghawng nain a tibuai a, set khatna laihawlah a trainer chuan han bawisawm ngial mah se set hnihna khel turin a inzuam ta lo a ni.
Kum 2017 daih tawha Flushing Meadows runner-up lo ni ve tawh American 14th seed Madison Keys chuan first round inkhel dangah 6-4 6-1-a Katerina Siniakova of the Czech Republic hnehin second round a lut.
Vawikua lai Grand Slam women’s doubles champion lo ni ve tawh Siniakova khan Paris Games zawh fel takah mixed doubles gold medal awrhin, beiseina sang tak nen New York a thlawklut a, tualchhung nula ngam loin second round a thleng zo lo.
Britain nula Harriet Dart pawh US Open second round lut zingah telin, British women’s number three hian 6-1 6-2-in Chloe Paquet of France a paltlang.
Nimina Briton hmeichhe dang pahnih Katie Boulter leh Emma Raducanu-te first round inkhel result erawh tarlan hman a ni lo.
World ranking-a a tawnsan ber hun tawnga world number 78 luahtu Dart hian kumin July thla khan an ram major tournament Wimbledon-ah third round a thleng a, US Open round thumna lut turin home hope McCartney Kessler vawtlatu Ukrainian 19th seed Marta Kostyuk a paltlang leh zet a ngai dawn.
Kum 28 mi Dart-i nu hian a fanu coach nihna nen New York hi a thutchilh ve mek a ni.