Ruahsurin Aizawl a tibuai ber

Fur ruahtui a tlak lai mekin Nilaini zinga chawl loa ruah sur chuan Mizoram hmun thenkhatah leimin leh chhiatna dang a thlen a. Aizawl khawpui chu a tihbuai ber pawl niin, Mamit khawpui luhna tur kawng a tiping nasa hle bawk.
Ruahsur hian district tam zawkah chuan chhiatna liantham a thlen lo nia report dawn a ni a. Aizawl Municipal huamchhungah erawh leimin hian inkalpawhna kawng a tihpin nasat avangin, a bikin Nilaini chawhma lamah mipui nunphung a tibuai tam hle a, a tam zawk hi thenfai zui nghal a ni.
Vaivakawn – Zohnuai kawnga lei che thin chu tun tumah hian che lehin, Durtlang kawng pawh leiminin a hnawh a, Lengpui Airport kalna kawngah pawh leimin, Sabereka Khuangkaih leh thing tlu in kawng a hnawh a, Nilainia helam kawng pantute a tihbuai deuh rualin, thenfai zui nghal a ni.
Kawng thenfai hna hi Mizoram PWD, BRTF leh khawtlang tangrualin a thlenna hmun azirin an thawk nghal hlawm a ni.
Leimin mai niloin, transformer chhia, electric line chhia leh electric ban tlu vangin power supply lamah buaina a awm bawk a. Power & Electricity department thawktuten theih ang angin an buaipui nghal bawk.
District headquarters zingah Mamit chu ruahsurin a tihbuai ber a ni a, Mamit kalpawhna kawng hrang hrang chu Nilaini hian a ping deuh vek a, theih ang angin thenfai hna thawh zui a ni.