Israel-in West Bank bei zui zel
Israel chuan Nilaini khan West Bank luchhuah thutin Jenin khawpui chu tlawhpawh theihloha siamin Israel-te sipai chetna avang hian Palestinian pakua-in nunna an chan tiin Palestinian officials te chuan an sawi.
Israel chuan nikum October 7-a Hamas tena southern Israel an beih atang khan ni tin deuhthaw West Bank ah chetlakna a nei deuh reng a ni.
Palestinian militant group-te chuan Israeli military te nen an inkap tiin an sawi a. Jenin governor Kamal Abu al-Rub chuan Palestinian radio hneah Israeli forces te chuan khawpui an hual thu sawiin khawpui chhuahsanna leh luhna te chu an dangchat vek tiin a sawi.
Israeli military pawhin West Bank a Jenin leh Tulkarem khawpuiah operation an neih thu puang bawkin mahse a bak a kimchangin engmah sawi an nei lo thung.
West Bank-ah hian thla 10 kaltaa Gaza-a indona thlen hnuah Palestinian 652 velin nunna an chan phah tawh tiin Palestinian Health Ministry te chuan an sawi.
Israel chuan Hamas leh militant group dang te nuaichimih an nih theih nan operation neih chu tihmakmawh tia sawiin chung militant te chu Israel beitute an ni tiin a sawi bawk.
Palestinian Health Ministry chuan Nilaini a Israel sipaite chetlaknaah Tubas ah mi pasarihin nunna chanin Jenin ah mi pahnihin nunna an chan tiin a sawi a.
Israel chuan West Bank, Gaza leh east Jerusalem te hi 1968 Mideast war a a lak kha niin heng hmun pathum te hi Palestinian te chuan an future State innghahna tur an tih a ni ve thung.
Israel chuan West Bank-ah hian settlement thahnem tak siamin chungah te chuan Jewish settlers 5,00,000 chuang an cheng mek tawh a ni. Heng mite hian Israeli khua leh tui nihna an nei a, chutihrual chuan West Bank ah hian Israeli military rule hnuaiah Palestinian 3 million vel an cheng mek bawk a ni.
Gaza indona hi nikum October 7 a irhchhuak tan kha niin Hamas kaihhruai militant te chuan southern Israel lutin army base leh farming community te luhchhuahin mi 1,200 chuangin nunna an chan phah a, mi 250 vel mitang angin a hruai bawk a ni. Heng mitang zingah hian a then chu chhuah zalen tawh niin mi 110 vel la hreng mek anga ngaih niin chung zinga hmun thuma thena hmun khatte chu an thi tawh nia ngaih an ni thung.
Israel chuan Hamas te chu chhang letin Gaza a run zui a, Palestinian 40,000 chuangin nunna an chan phah tawh tiin Gaza a Palestinian enkawl Health Minstry chuan a sawi bawk a. Mahse, nunna chan zingah hian militant engzah nge tih te erawh a sawi lo thung. Gaza a mi cheng 90% vel te chu chenna mumal nei tawh lova siam niin Israel chuan indo thlawhna nena a beihnaah Gaza chu a tlusawp chhe hneh hle tawh a ni.
United States, Qatar leh Egypt te chuan thla tam tak chhung inkahhai a awm theih nan hma an la chungin hmasawnna a awm thei meuh lo thung a. Nikum November thla kha chuan hun rei lo te inkahhaina siam niin chutih chhung chuan mitang thenkhatte chu inthleng tawn a ni bawk.
Israeli Prime Minister Benjamin Netanyahu chuan Hamas leh militant group te chu nuaichimih vek a intiam a, chutih laiin militant group te chuan inkahhaina hun awh rei leh Israel chu Gaza atanga a inhnuhdawh vek an ngiat ve thung.
Hetihlai hian Israeli Foreign Minister Israel Katz chuan Israel military te chuan West Bank a Jenin leh Tulkarm a refugee camp-ah te operation a nei mek tiin a sawi bawk a.
Israel-in a tum ber chu heng hmuna Iranian-Islamic terror infrastructure te tihchhiat vek a ni tiin a sawi.
Israel Katz chuan Iran chu Hamas leh Palestinian Islamic Jihad te kawng engkima thlawpah puhin, “Gaza a terror infrastructure te hi kan nuaichimih a ngai a, hei hi indona a ni a, kan chak ngei a ngai bawk” tiin a sawi.