Sport India Conference neihah Mizoram sports dinhmun sawi
Physical Education Foundation of India (PEFI) leh Sport India Foundation bultumin Pragati Maidan, New Delhi-ah Zirtawpni khan Sport India Conference 2024 buatsaih a ni a. Madhya Pradesh Sports minister Vishvas Kailash Sarang chu khuallian niin, Mizoram Sports & Youth Services minister Lalnghinglova Hmar chu khual zahawm a ni.
Conference hawnnaah Lalnghinglova Hmar chuan sports chu thalaite eizawnna leh India ram tihhmingthatna hmanrua ni theia ram pum anga inherrem a tul tih a sawi a. Mizoram chu state lian lo tak ni mah se, tunhnai kum 10 chhungin India ram football league sang, ISL leh I-League ah player 192 a thawh thei tih sawiin, grassroot level atanga zirtirna tha inpek a pawimawh tih a sawi.
India-in 2036 Olympic Games thlen a tumnaah India rama infiamna lar ber cricket thlauhthla chuang loin, India infiammite thatna Olympic sports discipline dangah nasa zawka tan lak a tul tih a sawi bawk.
Conference buatsaihtute ngenna angin Sports minister hi panel discussion-ah a tel a. Mizoram khua zawng zawng hrutchhuaka sports coaching project liantham kalpui tum a nih thu leh, sports-a theihna nei thate zawnchhuahna project a nih nghal tur thu a sawi.
Moderator zawhna chhangin Lalnghinglova Hmar chuan, Mizoramah hockey chawinung leh turin hma lak mek a ni a. Hockey chu hman atanga India thatna, khawvel mithmuha min phochhuaktu a ni a, hockey chu ngaihpawimawh zing ami a ni dawn tih sawiin, “Mizoramin hmeichhe hockey-ah nasa taka hma kan sawn laiin, mipa lamah tan lak kan la ngai a, theihtawp kan chhuah dawn,” a ti.
Kumina Sport India Conference-ah hian sports inrelbawlna dikin ram economy-a hmasawnna a thlen theih dan thlirho a ni a. “Global Trends and Opportunities in Sports Management: Impact of Professional Leagues and Sports Tourism on Economic Development” tih thupui hmangin India ram state hrang hranga sports thuneitu (administrator), sports industry leh private organisation lian, sports university hotu lawk leh sports lama tuimite an tel.
Conference pual hian August 29-31 chhungin Pragati Maidan-ah Sports India Expo neih niin, India ram chhung leh pawna sports industry lianten an thil siam an phochhuak a ni.