USA-ah chief minister kal

United State-a state pakhat, Maryland-a Mizo awmten Mizo Day an hman tura khuallian atana sawm chief minister Lalduhoma chuan Zirtawpni khan Mizoram chhuahsanin US a pan.
Ruahman ang chuan, vawiin – Inrinni hian New York a thleng anga, Maryland-a Mizo Day hmannaa khualliana a tan dawn bakah Washington DC-ah US State Department official-te a kawm anga, Indiana state khawpui Indianapolis-ah hun a hmang bawk ang.
Chief minister zin hi India sawrkar Ministry of External Affairs hriatpuinaa ruahman a ni a. US a thlen ve leh Consul General of India lamin an lo hmuak anga, a cham chhunga security an ruahman sak bakah a tul angin a programme-ah an tawiawm dawn a ni.
Chief minister hi a nupui Liansailovi, a tunu Zodinthari leh OSD to CM Jonathan Lalremruata ten an tawiawm a. An senso zawng zawng hi US atanga sawmtuten an tumsak a ni.