Mizoram an chak lo

Bengaluru a khelh khel mek National Sub Junior championship 2014-ah Mizoram Sub Junior team te chuan September ni 7, Inrinni khan an match hmasa ber an khel a, Delhi lakah 5-2 in an tlawm nghal. Mizoram hian vawiin ah Odisha an hmachhawn zui leh dawn a, an tlawm nawn leh a nih chuan semi-final lut zo lovin an tla ang.
Champion lai Mizoram hian Delhi lakah bul an tan tha viau a, si hnih faiin hma an hruai hman. Mizoram tan hian Abraham Malsawmhlua chuan goal hnih a thun. Reliance naupang league-ah FC Dawrpui Vengthar Under 14 tana khel mek Ab-a hian mawi zeta free kick a pet goal bakah lei hrulah chiang zetin a pet goal zui leh bawk. Ab-a goal hnih thun hnuin pumraw lian zawk Delhi in na takin an nawr let a, goal 5 ngawt thunin Mizoram an lehthal a, point thum hlu tak an hmu. Delhi hian Odisha an hneh leh a nih chuan Group C champion niin semi-final an lut ang.
Mizoram Sub-Junior team te hi Group C-ah an awm a, Meghalaya, Odisha leh Delhi te nen an awm tlang. Delhi an hmachhawn hnu hian September ni 9-thawhtanniah Odhisa an hmachhawn ang a, September ni 11, Nilainiah group match hnuhnung ber khelin Meghalaya an hmachhawn zui leh ang. Group match hnuhnung bera an hmachhawn tur Meghalaya hi kum dik lo avangin disqualify an ni. Sub-Junior National championship tier 1-ah hian state 12 inelna tur an ni a. Group champion te theuhin semi-final an lut ang.
Mizoram team hi footballer lar S. Malsawmtluanga chuan manager niin a hruai a, A license nei K. Lalrindika, Mission Vengthlang chu Head Coach niin, Anand Gurung, Tanhril chu assistant coach a ni a, Ramropuii, Aizawl Venglai chu Team Physio a ni.
Mizoram Sub-Junior team te hi hun rei tak chhung Sairang MFA Ground-ah an training a, inbuatsaihna tha tak an nei. Karnataka pana an zin chhuah dawn hnaiah an player 10 ngawt TW3 (Bone) test-ah an tla. Player 10 kal ve thei ta lo te ai hi chawpchilh takin hnawhkhah rum rum an ni a, player thar 10 zinga pakhat chuan TW3 test a paltlang zo lo leh. Bengaluru an thlen hnuin player pahnih an tla zui leh bawk a, Mizoram team vanduai a kal tluang. Kum kal meka age level inelnaah Mizoram aiawhte an chetha lo via a, champion lai an nihna Sub Junior lamah pawh player 13 ngawtin TW3 test an paltlang zawh loh vangin beisei san a har leh viau. Mizoram aiawhte hian beisei ang result an nei lo a nih pawhin an harsatna tawh hriat thim pui an ngai awm e!
Tw2 test an tih mai, ruh puitlin leh tlin loh ennaah hian state dangte pawh tla an awm tam hle. Thu dawnna in a tarlan dangin Arunachal Pradesh atangin player pakhat chiahin TW3 test a paltlang a, player dang zawng an tlak vek vangin inelna an hmachhawn thei lo. State thenkhat player te pawh an tla nual a, chawpchilh takin an hmunruak an hnawhkhat ve chuk chuk bawk. Mizoram hmachhawn tur zinga mi Meghalaya ngei pawhin elna an hmachhawn thei lo zui leh bawk.