NE Zone Inter State Badminton Championship
NE Zone Inter State Badminton Championship
September ni 7-10, 2024 chhung awh tur Kanaklata Indoor Stadium, RG Barua Sports Complex, Guwahati, Assam-a North East Zone Inter State Badminton Championships 2024 khelh mek chu vawiin hian a hmawr an bawk dawn a, team event pali zinga pathumah Mizoramin final lutin, pakhatah an champion a, a dang pahnihah silver an la bawk.
Mizoramin final a luhna category-te hi Boy’s Team, Girl’s Team leh Men’s Team event-ahte niin, nimin atang khan Open inelna chhunzawm a ni a, result tarlan hman a ni lo.
Boy’s Team Championship-ah hian Mizoramin first round-ah Meghalaya an hneh hnuin semi-final lamah Manipur an hneh leh a; final-ah Assam tum lehin, 2-0-in an hneh a, a vawikhatna’n NE Zone Inter-state Badminton Championship-ah gold medal an dawng.
Final-ah Mizoram tan H. Lalthazuala, Chanmari West chu first singles khel turin a inlan a, a tumpui Alvir Aman, Assam chu deciding game-ah a hneh.
Doubles khel turin Mizoram lamin Sainunmawia Sailo, Ramhlun Venglai leh C. Lalramsanga, Durtlangte an luhtir a, Assam lam atangin Shubhankar Dutta leh Animesh Gogoi-te an lut thung
Mawia leh Ramsangate thiandun hian harsatna lian tham tawk loin an tumpuite hi straight set-in an hneh a, reversed singles khelh a ngaih loh phah mai ni loin Mizoram badminton chanchina a vawikhatna’n Inter-state badminton championship-ah champion no mawi leh gold medal Mizoram tan an hlawhchhuak.
Badminton Association of India (BAI) chuan India ram hi zone parukah a then a, chu’ngte chu – North Zone, NE Zone, South Zone, East Zone, West Zone leh Central Zone.
He’ng zonal tinah hian inelna kalpui niin, category tina pakhatnate hian National Championship-a team event-ah inelna an hmachhawn thei thin a, Mizoram Junior Boy’s team-te hian tun November thla lo awm tura Bhubaneswar, Odisha-a nghah tur 46th Junior National Badminton Championship-a team event bikah North East ai an awh thei dawn a, Mizoram badminton chanchina bung thar leh rahbi thar min kaipuitute an ni.
Mizoramin final a thlenna category dang pahnihah gold medal a hlawhchhuak zo ta lo.
Girl’s Team Championship first round-ah Tripura an hneh hnuin semi-final stage-ah Manipur bawk hneh leh mah se final-ah erawh Assam lakah 2-0-in an chak lo.
Mizoram tan first singles-ah Lalrinkimi inlanin, doubles-ah Lalrempuii leh Zoramthari Renthleite an inkawp bawk.
He championship-a category ngaihhlut hlawh ber Men’s Team Championship-ah Mizoram hian first round-ah Nagaland an tum a, harsatna awm loin an tlang.
Semi-final lamah tournament thlengtu Assam an tum leh a, reverse doubles-ah straight set hmanga chakin 3-2-in Assam an hneh a, final hi an lut a ni.
NE Zone Inter-state Badminton Championship Men’s Team inelna huanga Mizoramin Assam a hneh vawikhatna a ni nghe nghe.
Final inkhel hmuhnawm takah Arunachal Pradesh nen intumin, 3-2-in a vanduai zawkah an tang ta thung.
First singles-ah Mizoram tan Saitluangpuia Sailo a inlan a, a tumpui Nikhil Chetry chu deciding-ah a hneh phawt. Second singles-ah H. Lalthazuala a inlan ve leh a, Laa Talar nen intumin, inhliam vangin |hazuala a inhnukdawk, 1-1 a ni.
First doubles khelhin a chhunzawm a, Mizoramin C. Lalramzauva leh Joseph VL Ringnghetate luhtirin, an tumpui Nikhil Chetry leh Samuel Tamang-te straight set-in an hneh a, 2-1 a nih chhunzawm.
Reverse singles-ah C. Lalramsanga leh Samuel Tamang-te an intum leh a, Arunachal Pradesh lam chungnung zawkin, chak zawkah an tang a, 2-2 a ni. Reverse doubles khelh a ngai a, Sainunmawia Sailo leh C. Lalramsangate tangdun chu Laa Talar leh Laa Tukum-te inkawp lakah deciding game-ah vanduaiin, 3-2-in Arunachal Pradesh lamin hnehna an chang a, an champion zui ta a ni.
Inter-State Badminton Championship hian ngaihhlut a hlawh a, state tinin an player tha ber ber an khelhtir thin tournament a ni. NE Zone Inter-state Badminton Championship-ah pawh hian tunhmain Mizoramin Assam hi an hneh thei ngai lo a, tunah erawh chanchin a danglam ta!
TATA Trusts, NEIDA, MSSC leh Mizoram Badminton Association-te thawhhona avangin badminton game-in Mizoramah hnuhma thar a hnutchhiah chho zel a, men’s team-in Assam an hneh hnuin junior team lamin gold medal hial an vawchhuak a; a vawikhatna’n Junior Girl’s team lamin final an lut bawk.
North East Inter-State Badminton Team Championship-a Mizoram aiawha player leh official thawkchhuak zawng zawngte Mizoram Badminton Association chuan a chhuangin, an hlawhtlinnaah lawmpuina a hlan tih thuchhuah siamin an tarlang a, an thawhpui TATA Trusts, NEIDA leh Mizoram State Sports Council-te bakah an team sponsor-tu zawng zawngte chungah lawmthu an sawi a, badminton game kaltlanga Mizoram leh India ram tihmingthatu ni zui zel thei turin badminton player-te duhsakna a hlan nghal bawk.