US Open champion Jannik Sinner

Keini huna thawhtanni zing lam khan US Open 2024 mipa final khelh a ni a, World No. 1 Jannik Sinner chuan set hloh lova tualchhung tlangval Taylor Fritz hnehin a champion. US Open champion thar Sinner hian ATP Ranking-a a hmahruaina a tihzau belh bawk.
Champion tura rinkai ber Jannik Sinner hian USA mipuite tan rawn Taylor Fritz lakah bul a tan tha viau. Kum 2006 hnu lamah American mipa zinga US Open final khel leh thei hmasa ber Fritz hian tan rawn hlawh viau mah se Sinner a ngam lo hle. Hun pawimawh takah a chetsual leh khut thin vangin Italian lakah a tlo zo lo, an tualchhungah ngei champion theihna hun tha a neih chhawr tangkai zo lo.
Sinner hian a khingpui American 12th seed Fritz lakah bul a tan tha viau a, set khatnaah break pawimawh tak a nei a, game thum chauh hloh chungin set a la. Set hnihnaah inhnehtawk chho viau mah se Sinner hian break pawimawh tak a nei zui leh a, game li hloh chungin set a lak belh leh. Set hnih a loh zawn hnuin Fritz hian set lak ngei tumin tan a khawh nasa viau a, khelmual chhunga mipui au ring takin tiphur viau mah se 5-5 a nih laiin a serve a hum zo lo leh teh tlat. Sinner hian champion theihna hun tha a neih chu a pawh pelh duh lo va, Fritz lakah hian 6-3 6-4 7-5 a hnehna changin US Open-ah a vawi khat nan a champion.
US Open-ah a champion ta mai chu Italian Sinner chuan mak a tih thu a sawi a, boruak rit takin a delh chunga a champion chu a ropui leh zual niin a hre bawk. US Open khelh tan hma ni ruk la awmah khan Sinner hi intihchakna a lo hmang tih hmuhchhuah a ni a, a mualpho hle. International Tennis Integrity Agency (ITIA) chuan Sinner hi sum chawi turin an hrem. He hremna hian mi dang duhkhawp a hlawh lo viau a, sawi zui pawh a hlawh hle nghe nghe. Mi tam tam chuan Ranking point paihsak leh inkhel thei lo turin Sinner hi an hrem ngei an ring hlawm. Heti a nih vang hian US Open ngei pawh a hmachhawn theih loh rinna lian tak a awm. Rin loh takin inelna hmachhawn phasak a ni a, ropui takin a champion zui ta nghe nghe a ni.
US Open khelh zawh rualin ATP ranking thar tihchhuah a ni a, champion thar Jannik Sinner-a’n ranking-ah hma a hruai fal leh zual a, No. 1 dinhmun a luah nghet. US Open-ah a champion vangin Sinner hian point a hmuh belh lawih a, ranking point 11,180 neiin a hnuai chiaha awm Alexander Zverev nen point 4105 laiin an inthlau. US Open semi-final lut Alexander Zverev hi ranking chhuak tharah No. 2 a ni a, Carlos Alacaraz leh Novak Djokovic te chungah a awm thar. Kum 2024 champion Novak Djokovic hian third round a pal tlang zawh loh vangin ranking point a hloh duai a. Second round paltlang zo lo Carlos Alcaraz pawhin point a hloh ve fe bawk. Heti a nih vang hian ranking point 7,075 nei thar Zverev hi World No, 2 thar a ni.
Hnah hlui an til
Kum khat chhunga inelna lian Grand Slam pali; Australian Open, French Open, Wimbledon leh US Open te khelh zawh a ni ta a, Jannik Sinner leh Carlos Alcaraz ten trophy lian pahnih ve vein an insem. Kum khat chhunga inelna hmasa ber Australian Open-ah a vawi khat nan a champion hnuin Jannik Sinner hian kum khat chhunga Grand Slam hnuhnung ber US Open-ah a tawp kharin a champion leh bawk. Hetihlai hian French Open leh Wimbledon-ah Carlos Alacaraz a champion ve thung.
Kum 2002 atang khan Big Four an tih mai; Roger Federer, Rafael Nadal, Novak Djokovic leh Andy Murray ten Tennis inelna lian an awp bet a, Grand Slam-ah an inchampion chhawk a ni ber mai. Kum 2002 hnu lamah Big 4 zinga pakhat tal hian kum khatah Grand Slam-a champion na an nei chho zel a, kum 2023 thleng kha tu emaw ber hi Grand Slam pakhatah tal an champion zel. Kum 2024-ah erawh Grand Slam-a champion zingah Big Four an tel ta lova, Jannik Sinner leh Carlos Alcaraz ten ro an rel ve thung. Tennis-ah hna hlui an thil a, hnah thar a chawr no ve tan ta a ni ber mai.
Grand Slam-ah vawi 24 zet champion tawh Novak Djokovic chuan 2024 chhungin Grand Slam a lak belh lo teh tlat. Serbian pa huaisen hian Grand Slam lak belh lo mah se a thlakhlelh ngawih ngawih, champion a chakna ber ni chho ta ngar ngar Olympic Gold Medal lain, mellung thar pawimawh tak a phun belh ta tho thung.