RK Dawla
Mb 9366095658
-- Advertisement --
1. September thla kan thleng leh ta a. Ruahtui tam kum a nih vangin, kan la hnâwng tha viau bawk. Tuilian leh leimin nasa thlen khawp erawh chuan ruahtui kan dawng meuh tawh lova. A awmzia chu Agricultural Soil kalral a tlem tawh tihna a nih chu. Mizote hian a engti kawng zawng pawhin leilung pawimawhna hi kan hre tâwk lo viau mai a. A bikin Agri/Horti sector-ah phei chuan, kan inzirtirna dik tâwk loh vang nge, kan ngai pawimawh lo êm êm a. Ram lum ruahtui tamnaa chêng kan nih vangin, Pathianin leilung awmdan tura a duan dan (natural system) ngai pawimawh hle tur kan nih tehlul nen.. Leimin, tuilian, lei dà, thlai natna leh rannung puang etc tam tak hi leilung kan enkawl dik loh vanga kan tawrhna a ni fo thin.
2. Tunlai khawvelah chuan lei hriselna (Soil health) hi khawvel pum puiah issue lian tak a ni chho mêk a. Lei a hrisel loh chuan, thlai a hrisel thei lova, natna leh eichhetu rannung lakah a derdêp a, thlai thar a hlawk lova, buaina tam tak a inchherchhuan thin. Chuvang chuan, khawvel mithiamte lu a hai a, lei tihrisel turin engtia hmalâk tur nge, lei hriselna tichhetu engtenge ni a, engtia herrem tur nge tihte kha an buaipui nasa hle. Keini lo hriatthiam theih dan tur chuan, lei hrisel tih chu lei hânna (organic matter tam) kha lei hriselna tura pawimawh hmasa ber (major keypoint) a ni phawt a. Lui tuilianin a hrût fo luikam phaite hi thlaiin an ngeih êm êm chhan chu, lei hânna a tam bik vang a ni. Tui lian khan ramngaw thli, ramngaw leihâng tam tak a rawn kalpui a, chu chu a kam phaizawlah a chap (deposit) ta a. Chubakah, lui kama hnim bit takte khan tui lian chîmin lei a tikalral tur an lo veng tlat a, tui force lo tinêmin tuia lei hâng awmte an lo man khawm bawk thin. He khuarel kalphung taka hi tlangramah pawh lei hânna siampung tura kan tihdan tur riruang chu a ni a, a do zawnga kan chêt reng chuan, kan hneh ngai dawn lo, natural system hi. Tin, hei hi kan theihnghilh tur a ni lo – leiah thlai kan ching a nih chhung chuan, lei hânna leh hriselna kan ngaihthah thiang lo!
3. Kan sawi fo tawh angin, khawvel huapa tharchhuak tam turin kan ram hian potential a nei sâng lova. Australia leh United States-te angin farm/ranch lian tak tak siamna tur ram rem kan ngah lo. Kan ram a zim êm êm. A zîm nâk alaiin awihpang kan ngah zawk ngial bawk. Ram nei tha deuh pawh kawngpui kam a vang êm êm, a vannei zualte chu kan hmunhma Link road-in a pawh tâwk a, furah motor a kal hleih theih loh fo. A nawlpui chuan, chhîp-in kan huan mamawhte leh tharchhuah kan la thiar mêk. Hetih mêk laia ram dang leh state dang, climate hrang, ram awihdan inanglo leh facility nei tha zawkte tihdan entawn ngawt thei kan ni lo. Kan ram neihte hi a nih ang ang hian, mi tihdan entawn ngawt lovin, kan envinronment mil tura kan herrem thiam a pawimawh zawk. Hei hi kan thar hlawkna tur mai ni lovin, kan tlona tur leh khawvel tourist kan hipna tur zawk a ni. Hei hi kan hre reng tur a ni – farmer rilru sûkthlêk a danglam loh chuan, land development kan tih hi a thleng thui tak tak chuang lo! Rilru kap fotu pakhat chu, huan thlai enkawl a, ranvulhtute zingah thalai kan tlem êm êm hi. Kan thalaite farming lamah an tui theih nân engtia hmalak chi nge ni ang tih hi sawrkar pawhin a ngaih pawimawh a tul hle. Nu tar pa tarin hna an thawk a, an tu leh faten an sulhnu zui an tum miah lo a nih chuan, engtinge ni ta ang? Tichuan, thluak fim leh ngaihtuahna tunlai zawk, technical deuh pawh hrethiam pha tur thalai lehkhathiamte farming-a luh kan intihhmuh chur chur hunah chuan, kan ram hmakhua hi a eng takzet ang.