Aizawl West by Pass Road- via- Airport
C.Vanlal Ruaia
9862569310
Lengpui Airport Via ZMC:
Ram muang kan nihna a rei tawh bawk a. Hma lam pana kan tlan chu a hun ta hle. Tun sawrkar hian chuan hma han la sela. khawpui traffic tawt lutuk siam tum an la awm ngai lova. Khawpui dai vel milian ram nek tur hian midik tak nih hmasak a ngai a. Thil ti tak tak tur ram hnukah chuan Land Acquisition rule te pawh hman tur a ni ang. Ramin a phu tawk Compensation chu pek ngei tur a ni ang. Tin, Greater Aizawl plan te pawh mimal ram ngah lutuk avangin a puitling thei lo.
Sihhmui Bazar – Sakawrtuichhun- Ramrikawn – Maubawk – Tlangnuam – Hlimen Ram – Samtlang – Hualngohmun- ZMC (Falkawn) Heng kawng hi han lai sela. A hlawk hlan na tur (feedback) chu nasa tak a ni dawn. He kawng hi a tlang chuan :-
1) ZMC-ah te MZU-ah te hian mithiam Visiting professor Lecture pe tur a koh an har lovang a. Lengpui Airport-ah hruaiin an thlah leh zung zung mai dawn a. Foreign ram atang paw’n lehlangin lecture an rawn pe thei dawn a ni. Mizoram Medical College-ah te, Seminar, Symposium. Workshop te siamin a hming kan hriat world Class Education te chu kan lo hnaih ve deuh tawh ang. Doctor zirna pawhin hma a sawn viau ang. Foreign mi thiam an lo kal sek chak ang. Mithiam sang apiangin kal (in exposed) an chak.
2) Tin, Hualngo, Samtlang, Tlangnuam Mission veng, Maubawk kawng pawhtute chu tlan chhuah nan leh tlan luh nan an hmang tawh ang a. Mizoram Chhim lam atanga Aizawl kal tur pawh an thlenna tur veng hnaih ber atangin an tlan lut ang a. Khawpui traffic zam hel a remchang tawh ang. Tin, Aizawl atanga Lengpui Airport Flight tur ten khawpui atanga tlan chhuah nan an hmang ang a. Traffic zama tan hlau lovin Ring road an man anga Reporting time tlai hlau lovin thlamuang takin an tlan ang a. Rangvamuala full load su/tawk zawnga tlan fo tawh lovin.
3) Tin, khawpui Extension atan a tha em em dawn a. Aizawl tlak lam ram hi Chhuah chhawng ram aiin a rem zawk mai thei. Tlangnuam ram zau tak, Hlimen ram zau tak, Serlui kam leh Huan zawl te Samtlang ram chhim lam leh hmar lam ruam te, Hmun rem vek, Lungleng Ram Project zawl te… Kulikawn leh Bawngkawn inkar ngawt maia Aizawla chhiara thil dah tum lovin. Plan thar siamtu chu a lar ngawt ang. Amaherawh chu Tlawng kam forest reserve chu ngun taka plan a, chen phul chi a ni lo vang. Mi ram khawpuiah Luilian pui pui a luang tlang thin a. An ti bawlhhlawh lova. Tih bawlh hlawh loh kan tum ve ang.
Vaivakawn hnuai Company Peng Lei Che hi:
Thui deuh hlekin sawi dawn ila. Leilung insiam dan , thui tak chu kan sawi hman lovang. Earth -Scientist ,Nigel Calder, a sawi dan han sawi ta ila. (Leilung lam mi thiam ka ni lova). Kan awmna lei hi Artui, a kawr var leh a chhungmu ang deuh hian a inthuah a. A tawi zawng in, a chhung ber, a lairil chu mei dil sa lutuk a ni. Tlangkang lo chhuah thinna hi a ni. Chumi chungah tuihnang (Slush) a awm a. Chung tuihnang chungah chuan Lungpher phek lian pui pui in a khuh leh a. Lungpher phek pui chu Plate an ti a, A kau kar/a khi karah khan chhunglam presssure a rawn chik chhuak thin a. Mei dil a lo chik chhuah khan Tlang kang kan ti thin. Chung Lungpher plate chungah chuan |iau leh lung thil a awm leh a, a chung lehah Leitha chungah chuan thing an to ta a ni. Chung Lungpher lian (Plate) chung lamah pawh lung lian pui pui a la awm thei a. Bur keh phuar khawm a ang ber ang. Plate an chet a, an innawrna a pial phei chuan lei paw’n thlengin a lei pang a phur kang tawrh thin a. Tin, plate leh plate a insulpel zawnga an chet paw’n lei pang a rawn ti che thei a. Tin Plate leh plate a inhlat zawnga an inkalsan chuan lei a lo phai a, chu chuan Plate them lung lian buk a siam thei bawk a. Heng lo pawh chet dan (movement) chi hrang hrang a awm a kan sawi vek thei rih lovang.
Tichuan Company peng lei tla hniam hi mihringte khawsak nana kan laih vang emaw, kan vah chereu emaw vang ni lovin, a chunga kan sawi thenkhat chhan eng ber emaw vang a nih hmel a. Chutiang chu lo ni ta se la. Lei pawn lam atanga rema tih dam mai theih a nih hmel loh a. Plate chein a rawn siam a nih hmel a, Vaivakawn Zohnuai Road mual che te nen hian a inzawm hmel riau a ni. Leilawn sei tak a, a chetna lai hmun thui taka kan dawh khum a nih loh chuan kawng khu season a danglam anga a chet zel hmel a. Chuvang chuan Airport Road (Aternative route) kawng hran siam vat hi chu a tul hrim hrim a ni.
Khung lai lei chet dan khu han sawi leh ta i la. Lei tlahniam kawng thlang lam pang mual kawr mawng/ lui kam thleng khuan a che sawp nuai mai a; a dur thla nuai mai a. Lei pawn lam climate danglam emaw; mihring ten Ngaw an thiah vang emaw, ram an hal vang emaw, a che niin a lang lo. A mual khuan a dur thla vek a. Chhunglam atanga che (internal tremor) ni ngei chuan a lang. Tlem lai deuha Check Dam an siam te pawh a la ngai reng, a din ngaiin an ding reng a, a tlu chuang lova. Tin, he mi zawn chiah Electric veng sihpui ruamah hian hman deuh khan a che vak bawk a, Hengte nen pawh hian thil inzawm a ni mai thei a ni. Mahse, keima mimal ngaih dan mai mai a nia. Mi thiam zawk ten han zir chiang se, a tha ngawt ang.