Bundesliga history thar ziaktu Kane

Inrinni zana Bayern Munich-in singa fai tehrenga mualneitu Werder Bremen an sawp tumin Harry Kane chuan mikhual team tan goal khat thawhin, ti hian, Tottenham Hotspurs chhuahsana Germany a thlen hnuah England captain hian Bundesliga game 36 khelin goal 41 a thun tling ta a, English player zingah Bundesliga history-a goal khung hnem ber a ni.
Weserstadion-a mipui 42,100 pungkhawm hmaah Michael Olise leh Jamal Musiala goal khat ve ve thun hmangin Bayern hian half time-ah sihnih faiin hma an hruai hman a; second half tir lam minute 57-ah Kane chuan box kilsir atangin Werder goalkeeper Michael Zetterer chhuah vawithumna a thlentir.
England captain hian Borussia Dortmund tana goal 40 khung tling Jadon Sancho lehpelin English player zinga German top flight league goal thun hnem ber nihna a chang thar ta a ni.
First half minute 23-na leka goal hmahruai khungtu Crystal Palace winger hlui Olise bawk khan Kane-a goal luh atanga minute thum hnuah he match-a a goal hnihna tilut ve lehin, he goal hi England international Kane-a chhawpdak a ni nghe nghe.
Minute nga hnuah Serge Gnabry chuan Bavarians goal ngana leh he inkhela goal lut hnuhnungber ni zui ta a thawh ve leh a, league bul tan fuh Vincent Kompany team-in vawili an khelh tawha hnehna la chang vek chungin Bundesliga hma an hruai nghet sauh sauh.
Kumin July thla maia Bayern Munich zawm France international Michael Olise khan goal hnih a khung bakah Musiala leh Kane-a goal tur chhawpsakin, a khel tha fal hle a ni.
Englishman kum 31 mi Harry Kane khan karliamta Champions League match pakhata 9-2 tehrenga Dinamo Zagreb an sawp tumin goal li lawih a thawh a, a club vawn lai tan inelna hrang hranga belhkhawmin match 50-ah goal 53 a lo tilut tling tawh a, Champions League emaw European Cup history hrim hrimah emaw English player zinga goal thun tam ber a lo ni tawh bawk. Tunah Bundesliga bika English top scorer a ni zui leh ta a ni.
Sancho khan Dortmund tana Bundesliga goal 40 puitlin tur khan match 118 zet a mamawh a, a record khumtu Kane erawh chuan goal 41 thun tling turin vawi 36 khelh chiah a mamawh.
Season liamta mai khan Sancho pawhin kum 1980 bawr chho daih tawha Cologne tan game 131 khela goal 39 thuna English player zinga Bundesliga goal khung hnember lo ni tawh Tony Woodcock-a record a lehpel a, tunah England captain ngeiin Sancho record chu a rawn thiat chhunzawm ve leh ta mai a ni.