MZP-in School Education directorate thentir an duh

School education directorate chu elementary leh secondary-a then an duh tih Mizo Zirlai Pawl chuan an sawi.
Champhai Tlangsama Thanghlianga Sailo Run-a MZP Assembly vawi 68-na Nilainia rorel inkhawmah Mizoram zirna in hma a sawn theihna atan Directorate of School Education chu elementary leh secondary-a then a nih theih nan hma lak an rel.
Zofa hnam hrang hrang zirlai pawlte nen thawhhona a that zawk theih nan “Students’ Leaders Meet” neih an rel a. Zofa hmun hrang hranga awmten inpumkhatna nghet zawk kan neih theih nan hma lak chhunzawm zel an rel bawk.
Mizorama inkalpawhna kawngpui sialtu, NHIDCL leh hnamdang company-ten tha zawka hna an thawh theih nan hma lak nise, an ti a. Mizoram schedule tribe list ennawn a nih theih nana hma lak leh, sawrkar hnathawk mahni nihna in a kentel aia tam hamthatna la leh hmangte sawrkarin a tih tawp theih nan hma lak nise, an ti.