Real tana goal khung thulh thei lo Mbappe
Real tana goal khung thulh thei lo Mbappe
Thawhlehni zanah 3-2-a Deportivo Alaves hneh hramin Real Madrid chuan an kawtkaiah point thum an hlawhchhuak leh a; he match-a goal khat thawhtu Kylian Mbappe chuan a club thar tana match kua a khelh atangin goal sarih a thun tling ta a, a game khelh hnuhnung vawisarihah goal ruk a tilut tling bawk.
Real Madrid shirt ha chunga game nga chhung goal khung zawn tling ta France captain hian chawlhlawk hma minute nga la awmah sihnih faia mualneitu team hmahruaina goal thawhin, goal hmahruai hi an thah fel hnu lawk, second 57-naa Lucas Vazquez tihluh a ni.
Half time dawna Frenchman Mbappe goal tur siamsaktu Jude Bellingham khan goal khung zo ve ta lo mah se hliam atanga a kirleh hnuah harsatna a nei chhunzawm lo zel a, Carlo Ancelotti tan lawmna tur lam zel niin a lang!
Second half tan hnu lawkah captain Vazquez siamsak atangin Brazilian Rodrygo chuan Real goal thumna a thawh ve leh a, mikhual team kha nuamsaa chak tura ngaih ngheh an ni.
Rin loh takin hun tawp lamah Alaves lamin a indawt zatin an siphurh pahnih an sut thawt a; mikhual goal hmasa zawk hi minute 85-a Carlos Benavidez thun niin, minute 86-ah Kike Garcia chuan Deportivo goal hnihna a tilut leh ta mai a, Ancelotti team an talbuai laih hman!
Santiago Bernabeu-a an hnehna sualchhuah hmangin league khelh sarihah Real hian point 17 hlawhchhuakin, table-ah pahnihna an luah a, an aia game khata khel tlem chunga hmahruaitu la ni chhunzawm zel Barcelona lakah point khatin an hniam a, nizan result tarlan hman lohah Barca hian table mawngphah chung chiah luahtu Getafe an mikhual a, an chak chuan Madrid nena an inkar hi an pawtzau leh sawt ang.
An kawtkaia hnehna an sualchhuah hram hnuah captain Vazquez Real Madrid TV hnenah thu sawiin, pui taka an khel chunga a tawp an khar dan buarchuar leh hahthlak tak kha zahthlak a tih thu sawi chungin minute 88 thleng ropui taka an khelh rahchhuahin hnehna a thlen avangin an hlim hle tih a sawi a, an inthlahdah zeuh kara goal hnih an chhuah hman erawh an tuar tih sawiin, an tawp kharna aia tha zawk kha an phu niin a sawi a, kawng dik an zawh kal zel tih a tarlang tel.
Pathianniah defending champion Real hian derby ngiahven hlawhah Atletico Madrid an hmachhawn leh ang.