A lerah Juve kirleh

A lerah Juve kirleh
Sithum fai tehrenga mualneitu Genoa sawp chungin Inrinni zan inkhel pakhatah Juventus chuan Serie A standing-a an hmahruaina an luahkir leh.
Zirtawpni khan AC Milan pawhin 3-0 bawka Lecce hnehin Juve hmahruaina an lua hlan a, Inrinniah Turin club-in point thum hlawhchhuak chungin khelh ruka point 12 nen Milan an hmakhalh zui leh ta a, San Siro club laka an chungnunna erawh a derthawng hle a, Italian top flight-a a sang pahnihte inthlauhna hi point khat chauh a ni.
Goal thun kawnga harsatna tawk Thiago Motta team tan striker Dusan Vlahovic chuan Genoa lakah goal hnih thunin, hun tawp dawnah Francisco Conceicao chuan Milan goal thumna a thawh ve bawk.
Juventus hian 3-0 hnehna hmanga season bul an tan zawn zet hnuin goal thun kawngah harsatna an tawk zui ta tlat a, Inrinni hmaa an league game khelh hnuhnung pathumah 0-0 draw vek an hlawhchhuak a, chu an harsatna tawh tha lo zet chu Genoa game-ah an titawp leh thei ta rih a, khelh ruka point 12 neiin hma an la hruai chhunzawm a, mahse, point 11 neitu Torina nena an inthlauhna hi point khat lek a nih avangin nizan result tarlan hman loh pakhatah Torino hian an mikhual Lazio an hneh chuan Turin khaw club dang Juve dinhmun hi a danglam leh thei.
Season liamta Serie A match-a vawihnih an intumah Juventus leh Genoa hi an inhnehtawk ve ve a, kumina an league match hmasa zawkah etawh Juventus an chungnung ta hle a ni.
Vawihnih inhnehtawk hlimhlawt an nih avangin Inrinni zana an intum leh tum pawh khan an inhlautawn deuh niin a lang a, fimkhur leh inveng ru ve ve chunga inkhel tih takah first half chhungin goal a lut lo a ni satliah mai lo a, team pahnihin goal zawna ball thawnluh an nei lo ve ve a; han phurawm deuh chu goal kham chunga Vlahovic-a free kick chhuihchhuah kha a ni deuh mai!
Second half erawh a dan a dang ta daih a, inkhel thawhhnihna an tan hnu lawka Koni De Winter-a handball vangin mikhual Juventus lamin penalty an hlawhchhuak a, Serbia striker Vlahovic chuan tihsual nei loin goal-ah a chantir.
Minute 53-naah Vlahovic bawk hian Teun Koopmeiners-a ball pek hmangin a goal hnihna a thawh a; a hnu lawkah Dutch midfielder Koopmeiners hian hnai set sawt atangin goal kham a chhuihper ve bawk.
Inkhel hun tawp dawnah Vlahovic chuan hat-trick siam theihna hun remchang hmu mah se rem veng vawng atangin goal pawnah a tauhchhuak hlauh.
Substitute Conceicao chuan hun tawp hma minute khat chauh awm tawhah penalty spot bul atangin one-touch finish pui tak nen sithum faia Juventus chakna goal a thawh a, table lerah Turin club an kirleh ta phawt.
Juve hian a zawnin game ruk chhung tehreng goal an chhuah lo tling ta a, hei hi an club history-a a hmasaber a ni.
Heti zat goal chhuah lo hnuhnungber chu Fabio Capello hun lai kum 1993 daih tawha AC Milan kha an ni.
Inrinni Genoa khaw game kha entu awm loa khelh niin a chhan pawh Coppa Italia fixture-a Serie B club Sampdoria anmikhual tuma home fans buaina siam vang niin, mi 50 chuangin hliam an tuar nghe nghe.
Juventus hian Nilaini zanah Champions League game khelin RB Leipzig an luhchilh ang a, October ni 6-ah Serie A game khelin table mawngphah luahtu Cagliari an mikhual ang.
Juventus laka an league game hnuhnung pathuma tlawm lo fai vek Genoa kha game ruk khelh tawhah vawikhat chiah an la chak a, point nga hum chungin table-ah 16-na an luah.