Chak lakna rel kawng chhia siam ran sawipui

Mizoram chak lakna pakhat, Assam ram chhunga rel kawng chhia siamthat ran dan tur sawipuiin Suppply minister B Lalchhanzova chuan Railway hotute a kawm.
Food, Civil Supplies & Consumers Affair minister B Lalchhanzova leh Northeast Frontier Railway (NRF) general manager Chetan Kumar Shrivastava hi October 4 khan Guwahati-ah an inkawm a. Minister hian kumin September 27-a Hailakandi district-a Jamira Rail Station bula rel kawng tuilianin a tihchhiat chu a hmuna a tlawh thu leh a hmuna thuneitute nen rel kawng siamthat a nih thuai dan tur an sawi ho tawh thu a hrilh. NRF hotu chu hmarchhak biala Indian Railways thuneitu sang ber a nih angin, he kawng siam hi theihtawpa hmanhmawh pui turin a chah.
NFR general manager hian he rel kawng hi Mizoram chak lakluhna kawnga a pawimawh zia an hriat thu leh rail service chhunzawm a nih thuai theih nan siamthat hna thawh mek chu an vil reng tih minister hi a hrilh a. Minister-in Jamira station bula rel kawng siamthat hna a hmuna a lo tlawh chu lawmawm a tih thu sawiin, hemi hnu hian ruah a sur leh tak fo avanga an tum anga chaka hma an la thei lo chu pawi a tih thu a sawi.
Kumin October chhunga hna zawh hman an tum thu a lo hrilh bawk. Kumin chhunga Sairang thleng railhead luh tir an tum chu Kawnpui Station-a leimin a awm avangin nakum kum laihawl vel an tinzawn a ngaih tak thu a lo hrilh bawk.