October 7, Thawhtan zan khan LZ Juice MPL 11, semi-final thawhkhatna khelh a ni a. League champion Aizawl FC chuan si hnih faiin an mikhual Sihphir Venghlun FC an hneh a, final an hnaih.
MPL ah tlawm nei lova champion hmasa ber leh season khata goal thun hnem ber record siamtu Aizawl FC hian MPL club thar Sihphir Venghlun FC lakah bul an tan tha hle. Inkhel tan atanga minute hnihna lekah Lalhriatpuia chuan hmahruaina goal a thun. Team lian zawk leh chak tura rinkai zawk AFC in goal an thun hmasak vangin SVFC an buai a, an insiamtha thei lawk lo. Khel tha rual tak Aizawl FC pawhin beisei angin goal an thun belh thei mai bik lo bawk.
Semi-final thawhkhatnaah hian team hnihte an innawr tawk viu a, goal a luh belh har hle. Hun rei tak chhung goal lut a awm belh theih loh reng hnuin bul tan tha Aizawl FC in a tawp an khar tha. AFC tan hian Lalrinzuala chuan minute 90+2-ah an goal hnihna thunin an hmahruaina a tizau. Hliam vanga chawl deuh reng Rinzuala a dam a, goal a thun zui leh nghal a. AFC tan a khelh hnuhnung pahnihah Rinzuala hian goal hnih a thun leh der tawh.
Lalrinzuala goal thun hnuin goal dang a luh belh thei tawh lova, Aizawl FC chuan 2-0 in hnehna an chang a, final an hnaih ta hle. Semi-final thawh hnihnaah Aizawl FC hian chak nawn leh an tum ngei dawn a, inlehthalna lian thlentir tumin Sihphir Venghlun FC in thapui an thawh ve bawk ang.
Aizawl FC in 2-0 a Sihphir Venghlun FC an hneh theih nana thawhhlawk tak Samuel Lalmuanpuia chu Kuriz man of the match ah thlan a ni. Semi-final thawh hnihna hi October 11, Ningani zan dar 8:00 ah khelh a ni dawn a. RG Stadium-ah Sihphir Venghlun FC in Aizawl FC an mikhual ve thung dawn a. An mualah hnehna chan ngei tumin tan an khawh nasa viau ngei ang.
Aizawl FC in final an hnaih
Get real time updates directly on you device, subscribe now.
Prev Post