Ganja man tam ber kumah la man belh zel

Kumin hi ganja man tam ber kum a ni der tawh a, excise force te’n an la man belh zel bawk. Thla kaw chhungin an man hnem tawh hle.
Mizoram Excise & Narcotics (MEN) department-in kuminah September thla thleng khan ganja hi kg 546.335 an man tawh a, kum danga an man zat nena khaikhinin kumina an man hi a tam hle.
Kuminah May thla thleng khan MEN department hian ganja hi kg 406.719 an man a, May thla thlenga an man ang zat hi kum dangah kum tluan pawhin an man ngai lo. May ni 31 a liam khan 2024 hi ganja an man tam ber kum a ni der tawh.
Kum dang kum tluana an man aia tam kuminah thla nga chhungin an man a, May thla hnuah an man belh zel bawk.
MEN department hotute chuan Mizoramah ganja a hluar tih an sawi a, tleirawl, kum lama la naupang zawkte’n ganja an zu thin tih an sawi.
Tleirawl ganja zute hian thil sual ti-ah pawh an inngai lem lo nia a lan thu an sawi a, meizial zukin an zu mai mai a, nu leh pain an hriat loh, ganja zu thin hi an awm nual tih an sawi.
MEN department hotute chuan ganja dona lama tan a ngaih thu an sawi a, khawtlangah leh chhungkuaah heti lama tan a ngaih thu, ganja that lohna leh hlauhawmna inhrilh a ngaih thu an sawi.
Tunlaiin ganja hi ‘weed’ tiin an sawi a, MEN department hotute chuan tleirawlte zingah intih changkan nana zu an awm thu, ‘weed’ tia ko duata tunlaina anga ngai an awm thu te an sawi. Khawvel mi larte zingah ganja leh a kaihhnawih zu thin an awm a, an mi ngaihsante vanga zu ve mai, a awmzia pawh hre lova lo zu ve mai te an awm thu an sawi bawk.