Netherlands hnehtu Germany in Nations League Semi-final an hnaih

Thawhtan zan khan UEFA Nations League khelh chhunzawm a ni a, Netherlands hnehtu Germany in semi-final an hnaih. Thawhtan zana inkhel dangah team lian France leh Italy in hnehna an chang ve bawk. Thawhtan zana Nations League result langsar zual kan tarlang ang.
Germany 1-0 Netherlands
League A, Group 3 hmahruaitu Germany chuan Bayern Munich khelmual Allianz Arena-ah team lian Netherlands an mikhual. Inkhel pawimawh takah Germany hian Jamie Leweling goal thun hmangin hnehna pawimawh tak an chang a, hma an hruai fal leh zual.
Allianz Arena-ah football ram ropui pahnih Germany leh Netherlands te an inhnehtawk viau a, goal thun thei an awm lawk lo. Darkar khat chuang zet an khelh hnuin Jamie Leweling chuan minute 61-naah hmahruaina goal a thun. Leweling hian hemi hma hian goal a lo thun tawh a, VAR rawn a nih hnuin a goal hmasa hi hnawl a ni thung. Captain Virgil van Dijk tel lo Netherlands tlarhnung a phui lo viau a, an goal chhuahna hi hnawl theih a ni ta lo a ni.
Group 3 lama inkhel dangah pathumnaa awm mek Hungary chuan mikhual an nihna hmunah table mawngphaha awm Bosnia and Herzegovina chu 2-0 in an hneh a, point thum an hmu. Hungary tan hian Liverpool midfielder Dominik Szoboszlai chuan minute 38-naah hmahruaina goal a thun a. Minute 50-naah penalty atangin an goal hnihna a thun zui leh bawk a, Mimualah hnehna an chang zui ta a ni.
Group 3-ah hian khelh li atangin Germany in point 10 an hmu a, hma an hruai chhunzawm zel. Germany hnuaiah hian Netherlands leh Hungary ten point 5 ve ve an hmu. Point 5 ngawta an san fal tawh vangin Germany tan semi-final a hnai leh zual sauh a. Semi-final lut turin an dinhmun a tha tawh hle. An chesual viau a nih loh chuan an hmahruaina humhimin semi-final an luh theih ngei a beiseiawm hle.
France 2-1 Belgium
Thawhtan zana inkhel ngaihven hlawh dangah France chuan mikhual an nihna hmun King Baudouin Stadium-ah 2-1 in mualneitu Belgium an hneh a, point thum hlu tak an hmu. France hi Group 2-ah Italy nen an inum chhunzawm zel.
Inkhel ngaihven hlawh takah team lian pahnih; Belgium leh France te an inhnehtawk viau a, chawlhlawk hmain goal khat ve ve an thun. Inkhel tan atang minute 35-naah Randal Kolo Muani chuan minute 35-naah hmahruaina goal a thun. An mualah goal chhuah hmasa zawkah an tan hnuin Belgium in na takin an khingpuite an nawr a, goal an thun thuai. Chawlhlawk dawn hnaih minute 45+3-ah Loïs Openda chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah France an khel tha chhunzawm a, goal pawh an thun leh thuai. Goal hmahruai thuntu Muani chuan minute 62-naah an goal hnihna a thun a, France in mualneitu Belgium lakah hma an hruai nawn leh. Hma an hruai nawn leh hnuin France an che fuh lova, minute 76-naah Aurélien Tchouaméni hnawhchhuah a ni. Tlem zawk ni chungin Mimualah inlan mah se France hian Belgium laka an hmahruaina an humhim thei hram a, hnehna hlutak changin point thum an hmuh belh.
Italy an chak nuamsa
Thawhtan zana team lian inlan zingah League A, Group 2 a hmahruaitu Italy chuan Israel lakah awlsm takin hnehna an chang a, group harsa takah hma an hruai chhunzawm zel.
Italy tan hian Giovanni Di Lorenzo chuan goal hnih a thun a, Mateo Retegui leh Davide Frattesi ten goal khat ve ve an thun. Israel goal neih chhun hi minute 66-naa Mohammad Abu Fani thun a ni. Group 2-ah hian Italy in point 10 an hmu a, France in point 9, Belgium in point 4 hmuin, table mawngphaha awm Israel in point an la hmu lo thung.