Dan pawngsualna

Minister thenkhatin RTI chhanna, a zawttute kut a thlen hmain an lo en ve thin, tih chanchin tharah kan hmu zo chauh a, dan dik lova learner & driving license pekchhuah thin thu hriattur a awm zui leh zat a. Dan hian pawngsual a lo tawk nasa thin hle mai.
Central YMA hruaitute chuan, tun hnai hun engemaw chen kalta atang khan, mi thenkhatte leh raltlan zinga mi thenkhat ten Driving License awlsam taka an nei mai thei thin chu chhui chiangin, mi engemaw zat an kawm chiang a. Heta tanga an thil hmuh chhuah chu, Mizoram mi leh sa dik tak zinga mi thenkhatte leh District Transport Officer (DTO) a thawktute inthurualin, danin a phut anga Learner & Driving Licence nei thei tura lehkha pawimawh (documents) thil tel ngai nei lote hnenah Learner & Driving Licence pekchhuah a ni ngei tih an finfiah thu an sawi a. Hemi chungchang hi transport minister hnenah an thlen nghal nghe nghe a ni.
Dan chunga leng tu mah an awm lo, tih hi thudik a ni. Dan siamtu (Legislator) te hian dan (Act) an siam a, chu chu a kengkawhtu an awm leh a. Tun kan dinhmun mekah hi chuan, dan siamtute leh dan kengkawhtuten dan an bawhchhe ve ve a, mipui tan chuan beisei tur a chau hle. Dan an bawhchhiat theih avang hian dan chunga leh an ni tihna a ni lova, Dan hnuaiah dan an bawhchhia a, dan bawhchhiate hremna dan a awm a, chu chu an chungah lekkawh theih a ni; Dan chunga leng an ni lo tihna a ni a; Dan an bawhchhia a ni zawk.
Dan pawngsualna hian eirukna a thlentir a; Mizoram hi eiruk hluarna a ni kan tih chuan, dan pawngsualna a hluar hle tihna a ni nghal. Tunah hian a finfiahna a lo lang chhuak mek a, dik lo na na na chu lo lanchhuah hun a awm lo thei lo a, tunhma atanga chin than kha, a chingtute an ngampa tulh tulh a, heti hian a rawn lâng chhuak ta ni ber a.
Inhawlh fai kan ngai ta hle mai!