US enkawl hnua Pochettino tlawm vawikhatna

US enkawl hnua Pochettino tlawm vawikhatna
World Cup inthlentawm tur ram pakhat United States manager a nih hnua game a vil vawikhatnaah Mauricio Pochettino chuan Pathianni khan Panama lakah sihnih faiin a team thar chakpui nghal mah se Nilaini zan friendly match pakhatah sihnih fai bawkin Mexico lakah US a tlawmpui.
Chelsea boss hlui Pochettino chuan inkhelh banah a naute khelh dan a ropui lo tih sawi chungin khati ang game chiah kha an tana zir tur tha chhawpchhuaktu a nih thu a tarlang tel.
Kum 52 mi Argentine coach chuan, “Kan khaikhawm dawn chuan keiniin Mexico kha an tha hret a, hnehna chan pawh an phu thlap a, mahse, keini hi la insingsa chho mek kan ni tih min hriatpui a dik ang,” a ti.
Guadalajara khawpui daifema Akron stadium inkhelah hian Fulham striker Raul Jimenez chuan kual pui zeta free-kick chhuihin first half laihawlah mualneitu team goal hmasa zawk a chhuihlut a; Cesar Huerta goal hmuh tur a wm zui leh bawk.
Karliamta mai khan friendly match bawkah Spanish club Valencia nen 2-2-a an inhnehtawk avangin fans lamin Mexico player-te khelmual chhuahsan tur thi an ‘boo’ khum hluah hluah a, kha thil avang pawh khan Nilaini zanah Mexican-ho khan an thenawm mikhual hneh an mamawhna a sang hle a ni.
An player langsar rualkhat – Christian Pulisic, Ricardo Pepi leh Weston McKennie tel loa fehchhuak USA khan hun pumin goal zawnah vawikhat chiah ball an thawnlut zo.
Kha match hmaa Mexico nena an game hnuhnung vawisarihah US khan tlawm an pumpelh fai vek a, head coach thar hnuaiah an tang zo ta lo a ni.
Mexico khan an team tana khel hnem ber Andres Guardado thlahna hun atan an hmang nghal a, minute 19-naa khelmual a chhuahsan rualin ram tana match 182 khe tling chunga international football chawlhsan ve ta Guardado tan mipuiin an thuthmun an thawhsan a, standing ovation pein an mihrang kalbo tur an thlahliam.