Kawtthlera Sakeibaknei lenpui vangin man

Kawtthlera Sakeibaknei lenpui vangin man
Thailand-a police-te chuan hmeichhe pakhat, a sakeibaknei vulh lai Pattaya kawtthlera lirtheia lenpuitu chu a thlalak a darh hnuah an man.
Video darhah chuan a sakeibaknei no chu khaidiata hlingin Bentley car chung hawnah phurin khawlaiah a vahpui a ni tih a lang. Vah chhuahpuitu hi Sri Lankan niin an ramah a haw leh tawh a. Sakeibaknei neitu hmeichhia, Sawangjit Kosoongnern nen hian inthian tha nia hriat a ni.
Thailand-ah hian sakeibaknei vulh hi phal a ni a; mahse, dan ang thlapa ziah luh (register) a ngai. Thailand-a thuneitute chuan Sawangjit-i hian Nakhon Pathom province-a Thai pa pakhat hnen atangin a lei a ni a, ani hian Pattaya-ah hian a dahsak a ni.
Thuneituten a vulhna hmun an endiksak chuan dan ang a lo pha lo va, hei vang hian phurh leh neih hi dan hnuaiah chuan a theih loh phah thei. A neitunu hian phalna nei lova ramsa a khawi avangin dan a bawhchhe phawt a, hei hi kum khat lung in tan leh an ram pawisa baht 1,00,000 chawi theihna a ni.
Police hian Sri Lankan pa pawh an zawng mek a, ani hi pool villa a luahah a awmpui a; mahse, tunah chuan Thailand-ah a awm tawh lo va. Vantlang zinga ramsa hlauhawm a chhuahpui avangin thla ruk lung in tan leh baht 50,000 chawi thei dinhmunah a ding mek.
Sawangjit-i hnena sakeibaknei hralhtu pawh phalna nei mumal hmasa lova a ramsa vulh a phurh sawn avangin hremna tuar thei niin, thuneitute chuan Thailand-ah hian dan ang taka sakeibaknei khawi lai 224 a awm mek niin an sawi.