Chhiatna hmachhawn dan zirho hi…

Nimin khan Serchhip DC hovin khuarel chhiatna a lo thlen thulha lo hmachhawn dan tur zirhona neih a ni a. Hei hi Mizoram tan chuan thil pawimawh tak a ni a, lirnghing na tak thlen theihna hmun (zone)-a awm kan nih piah lamah, lirnghing a thlen kher loh pawha ruahsur avanga leimin leh a kaihhnawih chhiatna hrang hrang thlen awlsamna, tlangram leilung thawl leh nghet lo taka awm kan nih avang hian, hetianga mock drill leh chhiatna hmachhawn dan zirhona/sawihona neih reng hi chu kan mamawh reng tho.
Chutih rual erawh chuan, kan ram leilung naupan dan leh a ngheh loh dan te hi chu kan hriain mit ngeiin kan hmu a, a takin kan tawng mek reng a. Kum tina fur ruahtui tlak laia chhiatna a thlen thin dan pawh kan hrechiang tawh hle. Chuti chung chuan, chhiatna lo thleng thei laka lo inven lawkna lam aiin, chhiatna a thlen phawt hnua lo hmachhawn dan tur lam hi kan tuipui zawk niin a lang. Chhiatna a lo thlen thulha lo hmachhawn dan tur zir hi a pawimawh narawh e; mahse chu aia kan dah pawimawh hmasak tur chu lo invenlawkna lam hi a ni.
Fur ruahsur laia tuihawkin chhiatna a thlentir nasat thinzia hi kan hmu thin a, kum tin a thleng ziah bawk; mahse, tuiluankawr hi kan ngaihsak tha duh reng reng lo, ‘tuiluankawr mumal zawk nei tura hmalak a ni’ hi kan ti kum tin mai zawng a ni ber e. Tuiluankawr mumal loh avanga chhiatna lo thleng hmachhawn dan tur zirho tluk tluk ai chuan, tuiluankawr tha tak siam mai kha a hahdamthlakin buaina leh chhiatna tam tak pumpelhna a ni zawk; mahse hei hi tun thlenga kan la tih theih loh a ni.
Chutiang zelin, awihpang bakbahaiah in kan sa a, a foundation tur kan lai hek huam a, a leilung chakna kan lai bo zo a, tuiluankawr mumal loh avangin lei a tawlh a, chenna in a tawlhpui a, a changin leiminin in a hnawl bawk a, chu chu kan kum tin hun hman dan a ni ta ber.
Khua a hul tan a, ruah sur loh lai hi, chhiatna thleng thei laka lo invenlawkna lamhawia hmalakna hun tha a intan chiah a ni. Nge, laiking pawnpui tah tur ang mai hian, kan chawl leh der der mai dawn?