An kawtkaiah Real an mualpho chhiava!

An kawtkaiah Real an mualpho chhiava!
Pathianni zan khan La Liga lamah El Clasico kan thlirliam a, Real Madrid khelmual Santiago Bernabeu-ah mikhual inthlahrung lo Barcelona chuan 4-0 tehrengin mualneitu team an sawp!
He inkhel liana goal hnih khungtu Barca veteran forward Robert Lewandowski chuan season kal lai inelna hrang hrangah a club vawn lai tan goal 17 a khung tling de r tawh a, chu’ng zinga goal 14 chu La Liga game 11 atanga a thun a ni.
Pole hian second half tir lam minute 54-ah Catalan team hmahruaina goal thunin, minute hnih a liam leh tihah Lewandowski bawk hian he match-a a goal hnihna a tilut zui leh a; mikhual goal hnih dang hi Lamine Yamal leh Raphinha-te thun a ni.
He result hnu hian league hmahruaitu Barcelona chuan point ruk ngawtin an hnuai chiaha pahnihn luahtu Real nena an inkar an pawtzau.
Real kha La Liga bika game 42 zet tlawm pumpelh tluang lai an ni a, Inrinni zan khan tlawm lo leh chiah se April 2017 atanga May 2018 inkara match 43 chhung tlawm lo Barcelona league record tluk chiah tur an ni a, record tluk an beiseina erawh Bernabeu-ah ngei a thamral ta a ni!
First half-ah goal a lut lo a, mak han tih ngawih ngawih tur engmah a la awm lo!
Second half a rawn herchhuak a, lehlam pawl tana Poland striker Lewandowski hnawksak thinzia a takin hmuh tur a rawn awm leh ta a, Marc Casado ‘through ball’ atangin a goal hmasa zawk a khung a, a hnu lawkah Alejandro Balde ‘cross’ atangin a goal hnihna a tauhlut leh bawk.
Kum 36 mi Lewandowski hian hat-trick siam turin hun tha vawihnih hmu mah se a hlawhtling zo ta bik lo a, a hmasa zawkah goal ban a fuh a, a hnuhnung zawkah rem zet atangin goal kham chungah a thlawhchhuak.
Kum 17 leh ni 106-a upa ni chunga mikhual goal thumna thawhtu Spanish rawlthar Yamal kha El Clasico-a goal thun thei naupang ber a ni.
Brazilian Raphinha tan tun kha Real Madrid laka a goal khat tihluhna a ni ve bawk.
Madrid coach Carlo Ancelotti chuan tlawmah pawh si phur nghek chunga chak loh boruak chu a rit ngawih ngawih tih inkhelh banah a sawichhuak.
Real Madrid hmatawng chhuanvawr Kylian Mbappe chuan khawvela football fixture hmingthang a khelh vawikhatnaah beisei a pha lo.
France striker hian goal hnih chu thun bawk mah se offside avangin hnawlsak a ni ve ve a; a goal tur dang chu Barcelona goa-veng Inaki Pena chuan a dansak leh bawk.
Mbappe hian Paris St-Germain thuam inbel chungin Barcelona hi February 2021 Champions League match-ah a lo ep tawh a, Nou Camp-ah 4-1-a Ligue 1 club chak tumin ‘hat-trick’ a siam.
Season liamta khan La Liga table-ah Barca chuan point 10-in champion Real an pha lo a; kumin hian veteran Lewandowski hoin squad naupang seng sawng Barcelona an rawn hlauhawm leh ta thung a, Hansi Flick-a team hi league-ah vawi 10 chak tawhin, vawikhat chiah an la tlawm.
Yamal kha an young star eng ber ni ngei bawk mah se kum 21 mi ve ve leh El Clasico-a assist siam thei ve ve ni bawk Casado leh Balde pawh kha lar chho har lo tura ngaih an ni.
Barcelona starting line up kan hmuha player paruk ngawt kha an youth academy hmingthang atanga zirchhuak niin, chuai mawh Lewandowski thlazar hnuaiah an hnawksak tawh hle a nih kha! Barca khan league khelh 11-ah point 30 hmu tawhin, heti zat match-ah Real-in point 24 an nei.
Clasico-a vawili an tlawm zawn hnuah March 2023 hnu lama a vawikhatna atan Real Madrid lakah Barcelona an chak ve leh ta hram a, La Liga top scorer Lewandowski thawhrah a langsar.